Јапонија со нова финансиска помош од 5, 5 милијарди долари за Украина

САД- Јапонскиот премиер Фумио Кишида во понеделникот најави нова финансиска помош од 5,5 милијарди долари за Украина и ќе ја одбележи првата годишнина од војната со тоа што ќе биде домаќин на онлајн самит на Г7 со украинскиот претседател Володимир Зеленски.

Кишида, говорејќи на глобален форум во Токио, организиран од јапонски тинк-тенк, рече дека Украина сè уште страда од руската инвазија и на нејзините луѓе им треба помош за обнова на нивниот секојдневен живот и инфраструктура која е тешко оштетена од руските напади.

Како овогодишен претседател на Г-7, Кишида рече дека ќе биде домаќин на онлајн самит на кој ќе му се придружи Зеленски во петок за да ја одбележи првата годишнина од руската инвазија. Тоа ќе биде првпат Кишида да биде домаќин на самит на Г-7.

Јапонија им се придружи на Соединетите Американски Држави и европските нации во санкционирањето на Русија поради нејзината инвазија и обезбедувањето хуманитарна и економска поддршка за Украина. Јапонија брзо реагираше затоа што стравува од можно влијание на војната во Источна Азија, каде што кинеската војска станува се понаметлива и ги ескалира тензиите околу самоуправниот Тајван, за кој Пекинг тврди дека е нејзина територија.

Во својот говор, Кишида призна дека направил одлучувачки потег поради „силната загриженост дека Украина може да биде утрешна Источна Азија“.

Тој рече дека руската инвазија е предизвик за целиот меѓународен поредок заснован на правила што става крај на ерата по Студената војна. „Затоа решив одлучно да и одговорам на (Русија) со санкции“.

Јапонија обезбеди заеми од повеќе од 70 милијарди јени (520 милиони долари) на Украина како итна економска помош. Земјата, исто така, прифати повеќе од 2.000 раселени Украинци и им помогна со помош за домување, поддршка за работни места и образование. (АП)