Јапонија донираше санитетско возило за Здравствениот дом во Свети Николе
Амбасадорот на Јапонија, Савада Хиронори, денеска официјално ја промовираше донацијата од неговата држава – ново сантитетско возило „нисан“ за Здравствениот дом во Свети Николе. На церемонијата присуствуваа градоначалникот на Свети Николе, Дејан Владев, и директорката на Здравствениот дом, д-р Славица Панева. Цената на санитетското возило е 54.633 евра.
„Во текот на изминатата година со новото санитетско возило се направени транспорти на 273 пациенти во животозагрозувачка состојба најчесто до клиниките во Скопје, Штип и Велес и поминати се околу 7.500 километри“ рече Панева.
„Драго ми е дека во период од една година, со оваа донација беше овозможен транспорт за половина од вкупниот број на пациенти во животозагрозувачка состојба, во Здравствениот дом Свети Николе. Јапонскиот народ е среќен и горд што му помага на македонскиот народ да има подобри здравствени услови“, нагласи амбасадорот Савада.
Преку програмата за мали грантови ГГП Јапонија финансираше над 60 проекти во здравствениот сектор во земјава во вкупна вредност од повеќе од 3 милиони евра во медицинска опрема, реновирање на клиники и возила за брза помош. Дополнително, Јапонија во последните две години ги опремува јавните здравствени установи со медицинска опрема во вредност од 813.000 евра како итна помош за Ковид-19.
Со ГГП Јапонија има финансирано реновирање и набавка на опрема за повеќе од 73 училишта и градинки, 64 здравствени установи и обезбеди 34 специјализирано возило за управување со отпад и комунални услуги за 51 општинa.