Јанез Јанша ослободен од сите обвиненија – приврзеници слават пред судската палата

Словенечкиот суд денеска донесе првостепена пресуда со која го ослободи Јанез Јанша, трикратен премиер и клучен опозиционер во земјата, и двајца наводни соучесници во обвиненијата за злоупотреба на службената положба и овластување и за корупција.

Јанша, претседателот на главната опозициска Словенечка демократска партија (СДС), претходно го отфрли обвинението, нарекувајќи го обид да се отстрани од политиката пред општите избори во 2026 година.

„И покрај тоа што ова беше јасна и видлива фарса од самиот почеток, обвинителот побара две години затвор. Оваа победа денеска е во наводници, нашата борба овде не е завршена“, им порача Јанша на своите радосни поддржувачи по излегувањето од судот.

Три пати беше словенечки премиер
Стотици негови приврзаници се собраа пред судската зграда во Целје на истокот на земјата, веејќи словенечки знамиња и носејќи транспаренти, обвинувајќи го судството за корумпирано и пристрасно.

Јанша, 66-годишен десничарски популист, беше обвинет за злоупотреба на моќта при продажба на имот во 2005 година, кога го служеше својот прв мандат како премиер. Во случајот се опфатени и директорите на две компании кои учествувале во серија трансакции со продажба на парцела во сопственост на Јанша во наводна размена за купување стан за него во главниот град Љубљана.

Јанша, кој се залагаше за независност на Словенија од тогашна Југославија во 1991 година и три пати беше словенечки премиер, во 2013 година беше осуден на две години затвор за поткуп во договор со финската одбранбена група „Патрија“ во 2006 година додека го служеше вториот премиерски мандат.