Јана Бурческа по втор пат мајка: По Дона не израдува Дарин
Сред пандемија на коронавирус, семејството на поп-пејачката и тв-водителка Јана Бурческа, препознатлива по убавиот глас и става, се израдува на уште нов член. Неполни три години по раѓањето на ќерката Дона, со сопругот Александар се израдуваа на синот Дарин. Речиси целата бременост во услови на корона ѝ била и стресна и убава, но како што вели, фала богу се поминало во најдобар ред и пред и за време на пораѓањето во приватната болница „Аџибадем-Систина“.
-Ако Дона е цела на тато и на неговото семејство со сините очи, моите најблиски ми велат дека Дарин потсетува на мене. Само нека се живи и здрави, ама сега синот нека личи на мене и да има сини очи на тато, вели Бурческа во разговорот за „Независен“.
Дебито на сцената ѝ беше во 2011 година во „Македонски Идол“. Во 2010 беше наш претставник на Евросонг во Киев. Музиката ѝ се врти постојано низ глава, иако домот последниве години и е центарот на животот.
Како се чувствуваш повторно во улога на мајка?
– Убаво иако знам што ме чека. Со Дона ми беше потешко, сега ми е полесно со Дарин. Ама како мајка се си има смисла и насока. Нема повеќе 1.000 „затоа“ за 1.000 „зошто“.
Дона потпорасна. Дали е љубоморна на братчето?
– Сега засега не, Ќе видиме. Таа е најубава на мајка, татина маза, муабетчика, насмеана, ведра, а исто така знае гласно да се бори за своите потреби. Понекогаш смета дека спиењето е залудно потрошено време, но затоа тука сме ние како родители да ѝ помогнеме во справувањето со предизвикот.
Што ти се смени во животот по раѓањето на децата?
– Би рекла дека животот ми е сега дозачинет со клучната состојка, а тоа е семејството.
Дали некој ти помага околу децата?
– Александар, се разбира. Мојата мајка исто така. Една од најголемите лекции што ја научив дури откако станав мајка е тоа што всушност значи мојата мајка. Првпат во нејзина кожа почувствував колку многу таа се вложувала за мене како нејзино дете и колку е голем интензитетот на мајчинската љубов, и општо колку се силни мајчинските емоции.
Дали бебето дојде планирано?
– Ако Дона беше најубавото изненадување кое ни се случило, со Дарин беше обратното- беше планирано бебе.
На кои важни лекции во животот ќе ги учиш?
– Да бидат искрени и отворени. Вистината е најмоќната алатка и најдобриот начин. Ќе ја учиме да се грижат за себе и своето здравје, за своето тело, ум и анимус.
Какви ти се професионалните планови?
– Засега се поврзани со емисијата „Стисни плеј“ на МТВ каде сум водителка. Снимавме две нови емисии ама моравме да прекинеме заради пандемијата. (Л.С.)