Израелски оперативци во Иран го убиле вториот човек на Ал Каеда

Огласот на американската амбасада во еден пакистански весник од април 2005 година во кој се прикажани лидерите на Ал Каеда на потерница. Убиениот Абдула Ахмед Абдула е последен во вториот ред гледајќи од лево на десно

Вториот човек по команда на Ал Каеда, обвинет за помагање при организирање на бомбашките напади во 1998 година врз две американски амбасади во Африка, беше убиен во Иран во август од страна на израелски оперативци кои дејствувале по налог на САД, објави во петокот „Њујорк тајмс“, повикувајќи се на разузнавачки службеници.

Абдула Ахмед Абдула, чие воено име беше Абу Мухамед ал-Масри, бил убиен од двајца мажи на мотор на улиците во Техеран на 7 август, објави „Тајмс“.

Убиството на Масри, кој се сметаше за најверојатен наследник на сегашниот лидер на Ал Каеда, Ајман ал Завахири, се чуваше во тајност до сега, пишува весникот.

Беше нејасно каква, ако има, е улогата на САД во убиството на милитантот роден во Египет, напиша „Тајмс“. Американските власти со години ги следеа Масри и другите оперативци на Ал Каеда во Иран, се вели во него.

Ал Каеда не ја објави неговата смрт, иранските власти ја прикрија и ниту една влада јавно не ја презеде одговорноста, вели весникот.

Американски официјален претставник, кој сакаше да остане анонимен за Ројтерс, одби да потврди какви било детали од приказната на „Тајмс“ или да каже дали има некакво учество на САД. Советот за национална безбедност на Белата куќа не одговори веднаш на барањето за коментар.

Масри, еден од основачите на Ал Каеда, беше убиен заедно со неговата ќерка, вдовица на синот на Осама бин Ладен, Хамза бин Ладен, објави „Тајмс“.

Осама бин Ладен ги организираше нападите врз САД на 11 септември 2001 година и беше убиен во американска акција во Пакистан во 2011 година.

Шиитскиот Иран и Ал Каеда, сунитска муслиманска милитантна организација, веќе долго време се непријатели.

Масри беше во „притвор“ на Иран од 2003 година, но живееше слободно во раскошното предградие на Техеран од 2015 година, тврдат за „Тајмс“ неименувани американски разузнавачи.

Американските официјални лица за борба против тероризмот веруваат дека Иран, исто така непријател на САД, можеби ги оставил да живеат таму за да спроведуваат операции против американски цели, рече „Тајмс“.