Израел го предупредил Трамп дека е на иранска листа за ликвидација

Израел ја предупредил американската влада дека Иран планира атентат врз претседателот Доналд Трамп. Според предупредувањето, раководството во Техеран наводно го развило планот дури неодамна, објавија Си-Ен-Ен и Волстрит Џуранал, повикувајќи се на неименувани извори.

Како што објави Си-Ен-Ен, американската влада често добивала слични предупредувања во последно време, но предупредувањето од Израел содржело конкретен план за атентат. Деталите за тој план во моментов се непознати.

Друг американски функционер рекол дека предупредувањето може да биде и обид да се влијае на одлуките на Трамп во врска со конфликтот со Иран. Израелскиот премиер Бенјамин Нетанјаху неодамна се залагаше за значително построг курс кон Техеран, поради што имаше и несогласување со Трамп.

Извештаите доаѓаат во време кога обновените напади меѓу САД и Иран предизвикаа страв од нова ескалација на конфликтот. Покрај тоа, Трамп во средата изненадувачки ја напушти Турција по самитот на НАТО во Анкара со стариот претседателски авион, наместо со новиот авион што му го подари Катар. Според американските медиуми, причината за промената на авионот била загриженоста на личниот безбедносен тим на Трамп поради безбедносни ризици.

Самиот Трамп изјави на маргините на самитот на НАТО дека Иран сака да го убие.

„Јас сум број еден на нивниот список за ликвидација“, рече тој.

Тој не одговори на прашањето на новинар дали го променил авионот за да се врати од Анкара поради заканите од Техеран. Стариот авион на Ер Форс Уан го превезе американскиот претседател до Велика Британија, каде што потоа се качи во новиот авион од Катар.