Изложба на олдтајмер автомобили по повод 8 Март

Републичкиот совет за безбедност на сообраќајот на патиштата (РСБСП) во соработка со СВР Скопје, Скопје Сити Мол и Здружението Љубители на Класик Мини и Пежо 404 – Клуб Македонија, организираше дружење и изложба на олдтајмер автомобили по повод 8 Март – Меѓународниот ден на жената под мотото „Намали ја брзината, зголеми ја сообраќајната култура“.

Претседателката на Републичкиот совет за безбедност на сообраќајот на патиштата, Гордана Кожуларовска во изјава за медиуми рече дека да се биде жена возач во 21 век, не е привилегија туку е секојдневна потреба.

– Да бидеш жена возач во 21-иот век, не е ниту привилегија, ниту општествен статус, туку секојдневна потреба. Секоја жена треба да стигне на време на своето работно место, да ги изврши обврските на работното место и во рамките на семејството, рече Кожуларовска.

Таа  на сите жени им го честиташе празникот 8 Март и упати апел до сите да се вози одговорно и безбедно.

– Со вашиот пример ќе ја подигнете сообраќајната култура од тој момент ќе ја намалите и брзината, ќе ја зголемите културата на сообраќајот, нагласи Кожуваровска.

Портпаролот на Министерството за внатрешни работи, Тони Ангеловски исто така упати порака за почитување на правилата и прописите на сообраќајот.

-Во име на МВР го честитам 8 Март, денот на жената, и оваа прилика да ја искористиме да ја упатиме повторно пораката, сите да ги почитуваме правилата и прописите во сообраќајот на тој начин за безбедни улици и патишта, рече Ангеловски,  кој додаде дека доколку сите ги почитуваме правилата и прописите, нема да имаме сообраќајни незгоди и на тој начин ќе нема и жртви на патиштата.

Учесниците на настанот имаа можност да ги погледнат изложените олд-тајмер автомобили од страна на Здружението Љубители на Класик Мини и Пежо 404 – Клуб Македонија во надворешниот дел на Скопје Сити Мол.

Меѓу олд-тајмер автомобилите изложени беа стари возила на Пежо, Класик Мини, Опел, Застава и други познати марки, а најавено е дека во склоп на настанот ќе биде организиран и почесен круг низ центарот на градот Скопје под истото мото „Намали ја брзината, зголеми ја сообраќајната култура“.