Ивајло Калфин: Софија не требаше да го употреби „тешкото оружје“

Поранешниот бугарски министер за надворешни работи и поранешен европратеник Ивајло Калфин, во интервју за бугарскиот портал „Фокус“ вели дека Бугарија многу брзо треба да ги изгради односите со Северна Македонија врз нова основа. Вели дека Софија не требала да го употреби „тешкото оружје“ – блокирање на Скопје.

– Блокирањето на преговорите, колку и да го нарекуваме одложување, запирање и сл., во практика е многу тешко оружје што Бугарија го користи. Не само во дипломатијата, добро да се покаже дека се има тешко оружје, но да не се употреби. Поентата е дека ние веќе го искористивме, и ова е на голема радост на сите оние кои не сакаат да го видат Скопје како членка на Европската Унија, кои не сакаат да гледаат добри билатерални односи, воопшто тие добија храна за нивната антибугарска кампања за следните години, вели Калфин.

Бугарија, според него, сега треба да преземе мерки за излез од ситуацијата со која сама себе се изолирала во ЕУ.

– Она што можеме да го очекуваме кај нашите соседи е дека дури и пријателите на Бугарија и билатералните односи ќе имаат избледени гласови и ќе се развие многу жестока кампања против Бугарија. И во Европската Унија, за жал, тие дури и не нè разбираат, не успеавме јасно да формулираме што точно сакаме како услов за почеток на преговори, што е проблем за Бугарија. И оваа кампања против Бугарија и изолацијата во Европската Унија е ситуација од која нашата земја не смее да чека, туку да преземе итни мерки за излез, оценува тој.

Калфин предлага градење на односите со Скопје врз нова основа и според него тоа мора да се случи многу брзо.

– Она што треба да се направи е да се изградат односите врз апсолутно нова основа, и тоа треба да се случи многу брзо. Забележав изјава, дека Германија ќе интервенира како претседавач со Советот на ЕУ за да помогне во решавањето на проблемите. Прво, Бугарија мора многу јасно да формулира кои се нашите проблеми и какви се условите за тоа. Пред околу еден месец, ги информиравме нашите европски партнери со еден долг и раскошен меморандум што содржи повеќе емоции, историја…, отколку конкретни и разумни барања. Значи, првото нешто што треба е јасно да формулираме што сакаме. Ова не е лесна задача, имајќи предвид дека ние во Бугарија не слушаме јасен став од владата, а камоли од нашите партнери, вели Калфин.

Второто нешто што Бугарија треба да го направи, според него, е веднаш да започне разговори на политичко ниво за излез од оваа ситуација.

– Не смееме да седиме и да чекаме, грубо кажано, кога точно властите во Република Северна Македонија ќе потклекнат, бидејќи тоа ќе биде на штета на обете страни. Ние мора да бидеме проактивната страна – мора да излеземе со предлози, мора да излеземе со формат во кој ќе преговараме. Преговорите мора да се водат на политичко ниво. Една од грешките на договорот од 2017 година беше што главните политички прашања беа пренесени на техничка комисија, на озлогласената историска комисија – таа нема како да ги реши. Постојат теми кои треба да го најдат своето политичко решение, оценува поранешниот бугарски министер за надворешни работи и поранешен европратеник Ивајло Калфин.