Италијанските телекоми бараат помош од ЕУ поради високите сметки

Здружението на италијанските телекомуникациски компании ја повика ЕУ да размисли како може да му помогне на секторот со трошоците за енергија и да ги заштити телекомуникациските мрежи од можни прекини, се вели во документот до кој дојде Reuters.

Енергетската криза беше проследена со низа деловни грижи на телекомуникациските компании во Европа, кои се најдоа во дилема помеѓу големите инвестициски потреби и слабата заработка, делумно поради жестоката конкуренција.

Во писмото испратено минатиот петок до еврокомесарот за индустрија Тјери Бретон, Assotelecomunicazioni побара телекомуникациските компании да се класифицираат меѓу енергетски интензивните сектори, што ќе им го олесни пристапот до мерките кои ќе им помогнат да ги платат сметките за електрична енергија.

Опасност од недостиг на електрична енергија

„Компаниите во телекомуникацискиот сектор продолжуваат да се соочуваат со зголемени трошоци за снабдување со енергија и мора да обезбедат континуитет на услугата“, се вели во писмото. Со оглед на зголемениот ризик од недостиг на електрична енергија по значително намалените испораки на руски гас, телекомуникациските компании истовремено се подготвуваат за можноста од прекини на електричната енергија кои би можеле да „исклучат“ делови од нивните мрежи.

„Јасен показател дека телекомуникациските мрежи не може да се исклучат… ќе им ја даде потребната сигурност на играчите во телекомуникациите и на целиот економски систем за континуитетот на услугите“, рече шефот на Assotelecomunicazioni, Масимо Сарми.