Историски пораз на социјалистите во Андалузија

Шпанската конзервативна Народна партија (ПП) постигна огромна изборна победа во неделата во најјужниот регион на Шпанија, кој историски беше најголемото упориште на социјалистите.

ПП освои 58 места, повеќе од 55-те потребни за апсолутно мнозинство, во најнаселениот регион во Шпанија. Партијата повеќе од двојно го зголеми бројот на места од изборите во Андалузија во 2018 година, кога освоија само 26.

Победата е голем поттик за ПП, на почетокот на изборниот циклус кој се очекува да кулминира со општите избори следната година.

Резултатот од неделата покажува поддршка за Хуан Мануел Морено, конзервативниот регионален претседател, кој управуваше со Андалузија од 2019 година во коалиција со либералниот Сиудаданос и поддршка од екстремно десничарскиот Вокс. Сиудаданос сега ги загуби сите свои места во парламентот. Вокс освои 14 места, две повеќе од последните избори, но изгуби одредено влијание со оглед на мнозинството на ПП.

Шпанската социјалистичка работничка партија (ПСОЕ) никогаш не изгубила во Андалузија. Но, овој пат освои само 30 пратенички места, три помалку од претходните избори.

„Андалузијците зборуваа“, рече Хуан Еспадас, лидер на социјалистите во Андалузија, за време на неговиот говор после резултатите во неделата вечер. „Од утре сум на чело на опозицијата“.