Ислахането во Битола доби статус на привремено заштитено добро
Министерството за култура соопшти дека Ислахането во Битола, објект од периодот 1894 – 1899 година, е ставено под заштита со акт што го донесе Управата за заштита на културното наследство по предлог на НУ Завод и музеј – Битола.
Ислахането е дел од старите турски училишта и академии во Битола, каде што професори биле познатиот Тефик-беј и Данали-ефенди со нивните ученици Кемал Ататурк и Али Фести-беј.
Училиштето започнало да работи околу 1900 година и било финансирано со државни средства, а во него се школувале деца кои биле сираци или од сиромашни семејства, така што истовремено функционирало и како сиропиталиште и како училиште.
Ислахането претставува објект кој, според оценката на надлежната установа НУ Завод и музеј – Битола, спаѓа во категоријата добро за кое основано се претпоставува дека претставува културно наследство што заслужува да биде ставено под заштита поради своите историски, културни и научни вредности.
Со актот за привремена заштита инициран по неодамнешната посета на министерката во Министерството за култура, Ирена Стефаоска во Битола, се утврдуваат границите на доброто и неговата контактна зона, како и режимот на заштита, со кој се утврдуваат ограничувања што произлегуваат од заштитниот статус. Рокот за привремена заштита, во согласност со закон, изнесува една година, кога надлежната установа Завод и музеј – Битола треба да изготви елаборат за валоризација на доброто, со што ќе се овозможи донесување акт за заштита, односно негова трајна заштита како културно наследство, информираа од Министерството за култура.