Иранскиот парламент го поддржа законот со кој се криминализираат интервјуа со „непријателски медиуми“

Иранскиот парламент денеска го поддржа нацрт-законот за криминализирање на интервјуа и другите форми на комуникација со медиуми што се сметаат за непријателски настроени кон Техеран. Пред да стапат во сила, новите текстови мора да бидат разгледани и од Советот на чувари – еден од најмоќните и највлијателните државни органи.

Предлог-законот предвидува казни од шест месеци до две години затвор за интервју или вклучување во дискусии со непријателски медиуми.

За интервјуа со странски медиуми ќе биде потребно претходно известување до Министерството за разузнавање, а остварувањето контакти со амбасади и канцеларии на странски организации без писмена дозвола од иранското Министерство за надворешни работи ќе се казнува со парична казна и одземање на некои социјални права.

Предлог-законот, исто така, предвидува зголемени казни за економски криминал извршени под раководство или надзор на странци.

Новите текстови забрануваат објавување информации на странци без одобрение од Министерството за разузнавање и ја ограничуваат научната соработка со странски институции кои не се појавуваат на посебна листа.