Индиските банки го сопреа увозот на злато и сребро

Индиските банки ги суспендираа нарачките за увоз на злато и сребро од странски добавувачи, додека тони скапоцени метали останаа заглавени на царината поради доцнење во издавањето на владина наредба за одобрување на увоз на златни прачки, соопштија трговски извори.

Според изворите, повеќе од пет тони злато и околу осум тони сребро не можат да се царинат во моментов, бидејќи новата директива на Генералниот директорат за надворешна трговија (DGFT), која ги одредува банките овластени да увезуваат скапоцени метали секоја година на почетокот на фискалната година, сè уште не е објавена, објави Ројтерс.

Индија е втор најголем потрошувач на злато и најголем купувач на сребро во светот, а речиси целата побарувачка се задоволува со увоз.

Според податоците на Светскиот совет за злато, побарувачката за злато во Индија падна на 710,9 метрички тони во 2025 година, што е најниско ниво во последните пет години.

Трговците предупредуваат дека недостатокот на нови пратки би можел да ги зголеми премиите за злато и сребро, додека послабата побарувачка од Индија би можела да изврши притисок врз глобалните цени на скапоцените метали.

Понискиот увоз би можел привремено да го намали трговскиот дефицит на земјата и да обезбеди поддршка за валутата на Индија, рупијата, која беше меѓу најслабите во Азија оваа година.