Инцидент во ГОБ „8 Септември“: Приведени шест лица, Филипче го осуди нападот врз лекарката

Шест лица вечерва се приведени во полициската станица Гази Баба поради инцидент во Градската општа болница „8 Септември“ во Скопје.

Како што информираат од болницата, инцидентот се случил кога роднини на почината 60-годишна пациентка од КОВИД-19 се обиделе да го земат телото на починатата и упатиле закани на докторката.

Еден од приведените бил позитивен на коронавирусот и тој е спроведен во полициска станица  со специјални протоколи.

Починатата пацинетка пет дена била на респиратор во ГОБ „8 Септември“. Согласно протоколите починатите пациенти од КОВИД-19  ги подигнува специјална екипа од погребалното претпријатие Бутел опремена со скафандери и друга специјална опрема.

Министерот за здравство Венко Филипче го осуди вечерашниот напад на докторка во ГОБ „8 Септември“ од семејство на почината пациентка од КОВИД-19, оценувајќи дека тој чин е крајно непочитување на здравствените работници кои деноноќно се борат за секој човечки живот.

Филипче истакнува дека е цврсто уверен дека  во случајот е постапено профсионално и согласно протоколите и ги повикува надлежните да го истражат случајот и да постапат соодветно.

-Вечерва во Градската општа болница „8 Септември“, докторка беше нападната од семејство на пациентка која по неколку дена болничко лекување почина од коронавирусот. Во случајот интервенираше полицијата која приведе неколку члена од семејството на починатата. Тие се обиделе насилно да го земат телото без да го спроведат соодветниот протокол за лица починати од ковид-19. Ова е чин на крајно непочитување на сите здравствени работници кои повеќе од 4 месеци деноноќно се борат за секој човечки живот. Ова е дискредитација на нивната работа, нивниот труд и жртва, ризикот на кој се изложени и одрекувањата, напиша министерот во објава на Фејсбук.

Овие луѓе, посочува министерот, со месеци ги немаат видено своите семејства, ги немаат прегрнато своите најблиски, немаат ден одмор и оддишка од напорната работа.

-Најостро го осудувам овој инцидент. Колегите кои се борат со преку 100 пациенти сместени во болницата заслужуваат само поддршка и разбирање, а не закани. Цврсто сум уверен дека тие постапиле професионално и согласно протоколите и ги повикувам надлежните да го истражат случајот и да постапат соодветно, стои во објавата.