„Импресиониран сум од креативноста на Виктор Орбан“: Полскиот премиер Туск за пронаоѓањето на скриените милиони на поранешен министер
Полскиот премиер Доналд Туск иронично коментираше за низата скандали во Унгарија, вклучувајќи го апсењето на братот на премиерот Виктор Орбан под сомнение за шверц со луѓе и извештаите за милиони долари во готово пронајдени во истрага против поранешен министер. Тој ја објави својата реакција на социјалната мрежа Икс.
„Пред неколку дена, братот на Орбан беше приведен за случај на трговија со луѓе, а вчера во шумата беа пронајдени 20 милиони долари, закопани од еден од министрите на Орбан. Драг Викторе, отсекогаш се восхитував на твојата креативност, но сега морам да кажам дека сум поимпресиониран од кога било“, се вели во соопштението на Туск.
Тој би сакал да се запознае со досиејата од истрагата, но засега не му е достапна никаква документација, додека сите понатамошни детали се адвокатска тајна, вака реагираше адвокатот на поранешниот министер во владата на Орбан, Миклош Шестак, за порталот „Телекс“ во врска со веста дека Националната канцеларија за враќање и заштита на средства (НВВХ) на 12 и 13 ноември, како дел од кривичната постапка против Шестак, пронашла готовина во вредност од речиси 6,5 милијарди форинти (17,8 милиони евра). Парите биле закопани во шуми, скриени во земјоделски објекти, магацини и станбени објекти, како и во скап сеф на скриено место.
Шефот на пратеничката група на КДНП (партнер на Фидес, партијата на Орбан) во унгарскиот парламент, Бенце Ретвари, побара од Миклош Шестак да го врати пратеничкиот мандат.
„Како шеф на пратеничката група на КДНП, го молам Миклош Шестак да го врати мандатот и да ја исчисти дамката од неговото име пред надлежните органи и да ја докаже својата невиност“, напиша Ретвари на својот Фејсбук профил.
Шефот на пратеничката група на Христијанско-демократската партија во соопштението потсетува дека – според соопштението на надлежните органи – во случајот со Миклош Шестак е запленета голема количина готовина, но дека адвокатот на пратеникот на КДНП негира дека пронајдените пари му припаѓаат на неговиот клиент.
„Овој случај претставува индивидуален кривичен случај, а кривичната постапка мора остро да се одвои од нашата политичка заедница. Петер Маѓар сака да го искористи ова за да ја претстави целата десница како криминална организација. Тоа го отфрламе најостро!“, заклучи во своето соопштение шефот на пратеничката група на КДНП.
Унгарската национална канцеларија за заштита и враќање на средства објави апсење на четири лица – тројца мажи и една жена – во заедничка операција со полицијата. Меѓу уапсените се, според достапните информации, братот на Виктор Орбан и неговата партнерка. Истражителите спроведоа претреси во Будимпешта и округот Пешта. Иако надлежната агенција не именуваше имиња во соопштението за медиумите, Петер Маѓар поврза едно од апсењата со Арон Орбан за време на говорот во Берлин. Унгарскиот премиер Виктор Орбан веќе реагираше на настаните. Тој го нарече целиот случај политичка пресметка и го оцени како обид да се одвлече вниманието од уште еден скандал поврзан со работата на унгарската влада.