Илијанчо Гаговски: Шпекулациите за опасност од 5Г мрежа се глупости и небулози без научна потврда

Глупости и небулози без никаква научна потврда се шпекулациите за опасноста од 5Г мрежа, вели поранешниот прв човек на канцеларијата на „Мајрософт“ во земјава и директор на „ПримАпс“, Илијанчо Гаговски, додавајќи дека оваа мрежа има нејонизирачко зрачење и не може лошо да влијае на здравјето на луѓето.

– 5Г е петтата генерација, наследник на 4Г. 5Г е ознака за петтата генерација безжични комуникациски технологии. 5Г ќе ги користи дел од веќе постоечките фреквенции кои се користат и со 4Г имено 900 мегахерци, 1.800 мегахерци, 2,6 гигахерци и 3,5 гигахерци. Дополнително, ќе користи френквентни опсези и околу 24 гигахерци, 28 гигахерци и 40 гигахерци, со тоа што најексплоатиран ќе биде опсегот околу 26 гигахерци. Највисоките фреквенции за кои се зборува се 81 до 86 гигахерци, ама тие веројатно нема да бидат мејнстрим, изјави Гаговски за „Утрински брифинг“ на „Слободна ТВ“.

Гаговски, кој има повеќе од 23 години професионално искуство во ИТ индустријата, вели дека за разлика од јонизирачко зрачење, кое има доволно енергија да избие електрон од некој атом или молекул и со тоа да го „јонизира“, што може да предизвика штетни последици по човековото здравје, па дури и канцер, нејонизирачко зрачење нема енергија да избие електрон од атом или молекул.

– Тоа значи дека (нејонизирачкото зрачење) не може да ја растури хемиската врска на молекулот на ДНК и не може да предизвика рак. Нејонизирачко зрачење значи – „немај гајле“, додава Гаговски.

Тој нагласува дека јонизирачко зрачење почнува на крајот на ултравиолетовиот дел на спектарот, веднаш под Икс-зраците. Гаговски објаснува дека 5Г мрежата ќе зрачи на 40 гигахерци или „во делот на сликата кој се вика микробран, односно длабоко во делот на спектарот кој е нејонизирачки.

– Сега ќе се зголеми фреквенцијата, но таа останува во истата класа на зрачење. Значи нема никаква опасност, додава Гаговски.

Откако деновиве на социјалните мрежи се појавија лажни информации дека „Македонски Телеком“ ја активирал пробната 5Г мрежа и дека таа има негативно влијание врз здравјето на граѓаните, реагираше компанијата, демантирајќи ги ваквите тврдења.

– Без докази и факти преку споделување лажни вести и стари медиумски написи од 2018 и 2019 година во погрешен контекст, се креира невистинита и негативна кампања за 5Г мрежата и се шири непотребна паника во услови кога треба да останеме смирени, соопшти „Телекомот“.