ИК на ВМРО-ДПМНЕ поддржа референдум, СДСМ одлуката ја нарече „фарса“
Извршниот комитет на ВМРО-ДПМНЕ на вечерашната седница едногласно ја прифати инциијативата за референдум и народно изјаснување во однос на штетните делови кои опфаќаат целосна асимилација, промена на историјата и бугаризација, изјави вечерва генералниот секретар на ВМРО-ДПМНЕ Ѓорѓија Сајкоски. Во перидот што следи, како што информира тој, партијата почнува процес на широка консултација со експертската и општествената јавност за природата, карактерот и формулацијата на референдумското изјаснување чија крајна цел, како што кажа, е „народно спротивставување на идентитетско обезличување”.
Сајкоски најави дека најпрво ќе направат широка консултација со општестевните чинители, па потоа ќе го водат процесот.
Седницата на ИК на ВМРО-ДПМНЕ се уште трае, а на нејзе се разговарало за актуелни теми, како што е политичката состојба со посебен осврт кон актуелното прашање врзано со преговарачката рамка и спорот со Бугарија.
„На површина излегоа сите лаги на Владата. Ветија и излажаа дека преговорите започнуваат веднаш, а преговорите започнаа само за Албанија,“ рече Сајкоски, додавајќи дека се уште останува ветувањето на пратениците на ВМРО-ДПМНЕ дека се против уставни промени.
Ваквата седница и одлуката СДСМ ги оцени како фарса.Според нив лидерот на ВМРО-ДПМНЕ Христијан Мицкоски е против ЕУ и само измислува нови обиди како нешто да попречи.