И во Германија рекорден број инфекции – 6.638

Германија објави рекордно дневно зголемување на потврдените инфекции со коронавирус, додавајќи 6.638 случаи и вкупниот број од почетокот на пандемијата сега изнесува 341.223.

Претходното рекордно дневно зголемување на Германија беше 6.294 на 28 март, според податоците на Институтот „Роберт Кох“.

Податоците од четвртокот покажаа дека бројот на починати се зголемил за 33 на 9.710.

Според европските стандарди, Германија доживеа релативно ниска стапка на инфекции и смртност досега за време на пандемијата, но новите дневни случаи скокнаа во последните неколку недели и канцеларката Ангела Меркел предупреди дека може да има 19.200 инфекции на ден доколку продолжат сегашните трендови.

Во средата таа најави нови ограничувања.

„Убедена сум дека она што го правиме сега ќе биде одлучувачко за тоа како ќе поминеме низ оваа пандемија“, рече Меркел. „Затоа мора да спречиме неконтролирано или експоненцијално зголемување“.

Ако некоја област регистрира повеќе од 35 нови инфекции на 100.000 луѓе во текот на седум дена, маските ќе станат задолжителни на сите места каде што луѓето имаат близок контакт подолг период.

Бројот на дозволени лица да се соберат исто така ќе биде ограничен на 25 на јавни и 15 на приватни простории.