И Британија ја префрли амбасадата од Киев во Лвов

Министерството за надворешни работи на Обединетото Кралство денеска објави дека привремено ќе ја премести својата украинска амбасада поради зголемените тензии меѓу Русија и Украина.

Британија ќе ја премести амбасадата од Киев во Лвов, лоциран во близина на границата со Полска, а истовремено ќе ги повика британските државјани во Украина да заминат додека сѐ уште се достапни комерцијалните опции.

„Секоја руска воена акција во Украина сериозно ќе влијае на способноста на британската влада да обезбеди конзуларна помош во Украина“, соопштија од Министерството.

Британија е една од последните западни земји што ја преместија својата амбасада, а амбасадорката во Украина, Мелинда Симонс, доби пофалби за нејзината одлука да остане во Киев со мал персонал и да им помогне на британските државјани да ја напуштат земјата.