Хрватски пратеник најави скорешно укинување на роамингот со Македонија, БиХ, Србија…

Оваа година треба да стапи на сила договорот за роаминг, според кој сите повици на мобилни телефони, исто како и користењето на интернет преку мобилен телефон, во Западен Балкан и ЕУ ќе ги плаќаме по исти цени како што плаќаме во нашите сопствени земји. Истото правило, да потсетиме, извесно време важи и кај членките на ЕУ.

Ова денеска на Твитер го објави пратеникот Бојан Главашевиќ, кој рече дека оваа идеја постои одамна, но сега е блиску до реализација.

„Денеска во парламентот се одржа комисијата за европски прашања, на која државната  секретарка Андреја Метелко Згомбиќ рече дека главниот договор е веќе потпишан, но треба да се потпишат уште неколку помали договори. На прашањето кога треба да се спроведе, таа рече дека треба да стапи во сила оваа година“, изјави Главашевиќ, додавајќи дека политичката волја за таков договор постои подолго време.

За кои земји ќе важи договорот?

Според Главашевиќ, во договорот треба да бидат вклучени сите земји од Западен Балкан (Србија, Македонија, БиХ…) кои на каков било начин се вклучени во процесот на влез во Европската унија.

„Ова е дел од една поширока идеја за пристапниот процес. На тоа се работеше додека Хрватска претседаваше со Европската унија. Идејата беше да се создаде модифициран пристапен процес, односно кога земјите ќе исполнат одредени критериуми, нивните граѓани веќе можат да уживаат во некои бенефиции уште пред да влезат во Унијата“, рече Главашевиќ.

На прашањето за кои цени ќе се однесува договорот, односно дали ги опфаќа и телефонските разговори и интернет сообраќајот, Главашевиќ одговори потврдно. „Но, ќе има и заштитна клаузула, која ќе спречи, на пример, некој од Хрватска да земе претплата во Србија и да плаќа по пониски, дампинг цени“, изјави Главашевиќ. (Индекс.хр)