Холандија забрани летови од Велика Британија поради новата мутација на корона вирус


Холандија забрани летови што доаѓаат од Велика Британија рано наутро во неделата по откривањето на новата верзија на корона вирусот. Забраната стапува на сила веднаш и важи до 1 јануари, соопшти владата.

Холандскиот национален институт за јавно здравје и животна средина (РИВМ) препорача да се преземат мерки за да се ограничи внесувањето на оваа верзија на вирусот од Велика Британија што е можно повеќе со контролирање на патничкиот сообраќај, што доведе до владина забрана за воздушен сообраќај.

Верзијата на вирусот опишана во Велика Британија веќе е идентификувана во случаен примерок во Холандија на почетокот на декември, се вели во соопштението на владата. Случајот треба дополнително да се испита за да се утврди кој бил засегнат, како настанала инфекцијата и дали се познати поврзани случаи.

Велика Британија во саботата најави ново затворање за Лондон и делови на југот и истокот на Англија, почнувајќи од недела, загрижена за брзото ширење на новиот вид на вирусот.

Неодамна откриената верзија е до 70 пати позаразна од претходно познатиот вид вирус, рече во саботата премиерот Борис Џонсон. Но, тој рече дека нема докази дека вакцината против новиот вид е помалку ефикасна.

Велика Британија ја извести СЗО за побрзо ширење на овој вид на вирус, а главниот британски епидемиолог Крис Вити во саботата изјави дека нивната советничка група за опасност од итни случаи и нови респираторни вируси (NERVTAG) верува дека новиот вид може да се прошири побрзо меѓу населението.