Груби: Владата го одобри договорот за Коридорот 8 и 10-Д

Владата денеска на предлог на Комитетот за преговори за изградба на Коридорот 8 и 10Д, го одобри договорот за изградба на Коридорот 8 и 10Д. Со Комитетот раководи првиот потпретседател на Владата, Артан Груби, кој ја соопшти оваа одлука и ја оцени како историска.

Одобрувањето на договорот за изградба на Коридорот 8 и 10Д доаѓа по четиринеделните преговори кои се водеа меѓу консултантот за финансиски трансакции на Владата, ИРД и меѓународниот конзорциум Бехтел Енка.

„Денеска е голем ден во Управниот комитет и во Владата каде го разгледавме Извештајот на нашиот консултант за преговорите со конзорциумот Бехтел Енка за изградба на Коридорот 8 и 10-Д како и одобрување на содржината и потпишување на договорот”, истакна Груби.

Воедно, Владата пред неколку недели го одобри заклучокот предложен од Комитетот за преговори дека се исполнети сите предуслови за почеток на преговорите и формирање на работни групи меѓу Бехтел Енка и ИРД, преговори кои траеја 28 дена.

Коридорот 8 е долг 68 километри, со автопат со шест ленти, од Тетово до Гостивар, Кичево, преку Струга до Ќафасан, додека Коридорот 10-Д од Прилеп до Битола е долг 40 километри и има шест ленти, во период од 3 години од почетокот на работите.

Реализацијата на оваа најголема капитална инвестиција во историјата на нашата земја ќе придонесе за економијата, модернизација на патната инфраструктура, што во иднина ќе овозможи дополнителен развој на услугите, подобри услови за развој на бизнисот, но и поквалитетен живот, врски со соседите и меѓународните коридори, се оценува во соопштението до медиумите.