„Грин Машинс“ на велешки „Брако“ се претстави на саемот во Бирмингем

На 14 и 15 септември „Брако“ со својот бренд на возила за одржување на хигиена во урбани средини „Грин Машинс“ учествуваше на RWM&LetsrecycleLive во Бирмингем, Велика Британија. На овој водечки настан во Велика Британија, на кој што учествуваа реномирани компании и врвни професионалци од сферата на управување со отпад, ресурси и одржливост, „Грин Машинс“ го привлече интересот и над 30 британски општини изразиле интерес за возилата произведени во Велес, како и за досегашните така и на нови потенцијални корисници.

На штандот во „Националниот изложбен центар“ биле презентирани дел од возилата кои што се дел од палетата на иновативните и технолошки најсовремени машини од линијата „Грин Машинс“: GM400ze, GM500ze и GM1ze.

– Одговорните на возните паркови од општинските совети на градовите го потврдија високото мислење за „Грин Машинс“ возилата, истакнувајќи ги придобивките од досегашното користење на истите, со намера да ја продолжат соработката. За таа цел, со повеќе од 30 британски општини , закажавме демонстрација на возилата и пробно возење во кругот на општините од страна на идните корисници, истакна извршниот директор на „Брако“, Благој Шалев.

Инаку, со повеќе од 550 изложувачи и повеќе од 12 илјади посетители речиси секоја година, RWM&LetsrecycleLive преставува платформа преку која што се забрзува транзицијата кон подобра и еколошки почиста планета преку искористување на нашите природни ресурси, што силно се надоврзува на визијата и мисијата на „Брако“ и „Грин Машинс“ за почиста и поздрава животна средина.

Годинешното издание на RWM&LetsrecycleLive се одржуваше во денови кога Велика Британија, но и останатиот дел од светот е во жалост по смртта на Нејзиното Величество, Кралицата Елизабета Втора. Токму поради тоа и овој настан во Бирмингем, поминал во духот на оддавањето почит кон животот и делата на Кралицата.