Грција во исчекување на клучната дебата на лидерите пред изборите

Водачите на главните грчки политички партии ќе одржат телевизиска дебата денеска (10 мај) пред националните избори на 21 мај, кои, во оваа фаза, најверојатно нема да произведат влада.

Во првиот круг од изборите ќе се применува пропорционален систем, а неколку аналитичари инсистираат дека само коалиција на партии ќе може да формира влада.

Доколку првата партија не успее да формира влада, тогаш во јули се очекува втор круг. Се проценува дека една партија или коалиција на партии треба да достигне речиси 37 отсто од гласовите за да може да добие мнозинство во парламентот.

Владејачката централно-десничарска партија Нова демократија води на сите анкети, по што следи главната опозициска партија Сириза и социјалистичката Пасок.

Се очекува Пасок да ја игра улогата на креатор во формирањето влада. Сириза отворено рече дека сака прогресивна коалиција со Пасок, додека Нова демократија изјави дека претпочита еднопартиска влада.

Пасок, засега, ги чува своите карти во тајност, иако Ираче Гарсија Перез, лидер на групата СиД во Европскиот парламент, изјави за „Еурактив“ дека каква било соработка со ЕПП (каде што е Нова демократија) веќе не е можна бидејќи десниот центар на ЕУ преминал линијата преку склопување сојузи со екстремната десница.

Антивладиниот печат изјавата ја протолкува како „индиректна“ порака до Пасок да се држи настрана од Нова демократија.

Средбата минатиот месец меѓу социјалдемократскиот германски канцелар Олаф Шолц и лидерот на Сириза Алексис Ципрас, исто така, не остана незабележана. По средбата, Ципрас рече дека разговарал со Шолц за значењето на прогресивниот модел на управување за Европа.

Политичките партии се мачеа да најдат заеднички јазик за да организираат дебата пред изборите. Ципрас инсистираше на тоа дека треба да се одржи посебна дебата меѓу него и Мицотакис.

Сепак, грчкиот премиер Киријакос Мицотакис постојано го избегнуваше, што ја натера Сириза да тврди дека се плаши од „јавната споредба“.

Од друга страна, извори од Нова демократија тврдат дека на Мицотакис не му е потребна билатерална јавна пресметка со Ципрас, со оглед на тоа што тој води на изборите.

Во меѓувреме, најголемиот грчки телевизиски канал Мега го стави во тесно грчкиот премиер. Директорот на каналот испрати писмо до Мицотакис и Ципрас во кое предлага да се организира дебата меѓу нив веднаш по дискусијата со сите кандидати.

Сириза веднаш го прифати предлогот, а Нова демократија категорично го отфрли.

„Оние кои го сакаат гласот на грчкиот народ не можат да се кријат“, коментира Ципрас.

Сепак, структурата на дебатата беше силно критикувана од европратеничката од „Обнова Европа“, Софи ин’т Велд, која го предводи комитетот на Европскиот парламент за таканаречениот „грчки Вотергејт“.

Таа неодамна твитна дали „постои етички кодекс за радиодифузерите“, имајќи предвид дека една од новинарките што учествуваат во дебатата е сопруга на градоначалникот на Атина (внук на премиерот), а друг е оженет со пратеник од владејачката Нова демократија.