Грција побара помош од Европол во истрагата за катастрофата со бродот со мигранти

 Грчките органи за спроведување на законот побараа од европската полиција Европол поддршка во нивната истрага за катастрофата со бродот со мигранти во Средоземното Море, во која се верува дека загинаа неколку стотици луѓе, додека потрагата по преживеани завршува, јави ДПА.

Истрагата се фокусира на деветмината преживеани кои беа уапсени како осомничени шверцери. Еден од нив сè уште е во болница. Египќаните – на возраст меѓу 20 и 40 години – се обвинети за трговија со луѓе, убиство од небрежност и формирање криминална организација.

Тие, наводно, припаѓаат на синџир шверцери на луѓе кои можеби организирале до 18 од опасните премини од либискиот брег до Италија во последните месеци, јави грчката државна телевизија ЕРТ.

Со помош на Европол, грчките истражители се надеваат дека ќе ги утврдат нарачателите на шверцот.

Уапсените лица беа идентификувани преку изјави на други преживеани.

Весникот „Катимерини“ информира дека еден од уапсените признал дека примил пари за работа на бродот и дека другите ги негирале сите обвиненија.

Преживеаните рекоа дека платиле од 5.000 до 6.000 евра по човек за патувањето.

Осомничените шверцери в понеделник треба да бидат изведени пред истражен судија.

Во средата, рибарски брод преполн со 500 до 700 мигранти потона на пат од Африка кон Европа. Вкупно 104 луѓе беа спасени, додека 78 беа пронајдени мртви.

Според грчката крајбрежна стража, другите патници биле под палубата и биле збришани со чамецот.

Според грчката крајбрежна стража, другите патници биле под палубата и потонале со бродот.

Местото на несреќата, на околу 90 километри југозападно од полуостровот Пелопонез, се наоѓа точно над Амбисот Калипсо, кој со повеќе од 5.000 метри е најдлабоката точка во Медитеранот. Можно е рибарскиот брод никогаш да не биде извлечен.

Грчката крајбрежна стража денеска сè уште пребарува во регионот со фрегата, три патролни чамци и хеликоптер. Сепак, силниот ветер им ја попречува работата.

Надежите за спасување на уште преживеани практично не постојат. Грчките медиуми шпекулираат дека потрагата постепено ќе биде завршена викендов.