Грција ќе ги укине сите рестриктивни мерки до почетокот на летото

АТИНА – Како што се приближува летото така Грција постепено ќе ги укинува рестриктивните мерки наметнати од пандемијата, а до Велигден, според најавите од министерот за здравство, се очекува да се олабават низа рестрикции.

Министерот за здравство, Танос Плеврис, во изминатите денови потенцираше дека намерата е чекор по чекор деескалација на мерките. Сепак, Плеврис, но и грчките епидемиолози паралелно потенцираат дека пандемијата не е завршена, станува збор за динамична ситуација и конечните одлуки лесно можат да се променат.

Во секој случај, пораките се дека која било мерка што се укинува, од септември можеби да биде потребно одново да се разгледа и евентуално повторно да се воведе.

Минатава седмица беше соопштено укинување на неколку мерки што се однесуваат на казните за невакцинираните граѓани над 60-годишна возраст, на задолжителните селф тестовите, односно тестовите за домашна употреба за учениците и просветните работници и на исполнетоста на стадионите.

Од 15 април привремено ќе се укине административната месечна казна од 100 евра за невакцинираните граѓани кои се над 60-годишна возраст, а мерката, што беше воведена на средината на јануари, одново ќе се разгледа во септември.

Стадионите ќе функционираат со целосна исполнетост, а учениците и вакцинираните просветни работници ќе прават само еден селф тест седмично.

На почетокот на месецов се укина задолжителната маска на отворено, а од пред десет дена повеќе не е потребно пополнување на ПЛФ формуларот за патување во Грција.

Ова, засега останува и единствената промена во однос на туристите. Правилата за влез во Грција остануваат непроменети, потребен е документ за Ковид-19, кој исто така важи и за пристап во речиси сите објекти во земјата, без разлика дали се продавници, кафулиња, ресторани, таверни, музеи, археолошки локалитети, кина, театри, спортски објекти итн.

Сертификатите за вакцинација и прележана болест имаат различно времетраење за патување во земјата и различно за влез во просторите во внатрешноста на Грција.

За патување, сертификатот за вакцинација е со важност од девет месеци по втората доза и без ограничувања по примена бустер доза, потврдата за прележана болест трае 180 дена, а доколку се патува со негативен тест, треба да биде направен 72 или 24 часа претходно, во зависност од тоа дали е ПЦР или рапид.

Документот поврзан со Ковид-19, речиси секаде во Грција, при влез во објектите, се скенира со специјална апликација, потребен е и документ за лична идентификација, а исклучок се супермаркетите, аптеките, продавниците за храна,бензинските пумпи.

Невакцинираните и понатаму не можат да влезат во затворените простори, а за надворешните делови на угостителските објекти потребно е да имаат негативен тест.

Маската, и понатаму е задолжителна во затворените простори, а постои силна препорака за употреба и на отворено доколку постои гужва.

Во изминатиот период, во Грција има зголемување на бројот на нови случаи на Ковид-19, што веројатно се должи на брзото ширење на подваријантата на Омикрон, меѓутоа и според епидемиолозите и според министерот за здравство, овој пораст не носи притисок врз здравствениот систем.

Доколку се анализираат официјалните податоци на Националната организација за јавно здравје на Грција, во изминатите 15 дена, во просек дневно имало по 21.100 новозаразени и по 48 смртни случаи од Ковид-19. (МИА)