Грција го затвори Акропол, рекордни температури на Јадранското Море

Акропол во Грција е затворен со часови, рекордни температури на морето во Хрватска а во Италија се планира животните во зоолошката градина да се хранат со сладолед – јужна Европа се пече под „пеколно жешкиот“ топлотен бран.

Грчкото Министерство за култура нареди затворање на Акропол – најголемата културна атракција во земјата – на пет часа од 12 часот по локално време во средата, принудувајќи ги туристите кои се надеваат дека ќе го посетат храмот Партенон на врвот на локацијата да се редат рано наутро. Црвениот крст им подели разладена флаширана вода и информативни флаери на оние што чекаа на ред.

„Го завршивме тоа и брзо излеговме, а сега одиме на климатизација и уште малку напитоции уживаме во денот“, рече Тоби Данлап, кој беше во посета од Пенсилванија и штотуку го обиколи Акропол. „Но, горе е жешко, навистина е. Ако не дојдете подготвени, ќе се испотите“.

Топлината доаѓа главно од топол воздух што дува од Африка, за кој метеоролозите прогнозираат дека ќе продолжи до недела. Температурите се очекува да достигнат до 43 степени Целзиусови.

Во Италија, двајца пожарникари загинаа при гаснењето на пожарот во регионот Базиликата на југот на земјата, соопштија властите.

Официјалните лица го додадоа Палермо, Сицилија, на списокот од 13 италијански градови со предупредување за силна топлина. Постарите луѓе во градот Верона беа повикани да останат внатре, додека прскалки беа поставени за да се разладат минувачите.

Во Рим, туристката Кармен Дијаз, од Мадрид, се обидувала да се излади со вентилатор за време на ручек. „Пеколно е жешко“, рече таа. „И овие вентилатори малку помагаат, навистина е жешко“.

Предупредувања за горештини има и низ градовите на Балканот.

Во Хрватска, властите објавија највисоки температури на Јадранското Море,  при што термометарот достигна речиси 30 степени Целзиусови кај Дубровник, најпопуларното туристичко место во земјата.

Во Србија, државното претпријатие за електрична енергија во вторникот објави рекордна потрошувачка поради користење на клима уреди.

Во Албанија, жештините ја натераа владата да го презакаже работното време за државните службеници, со што на некои им беше полесно да работат од дома.

Македонија се бори со десетици шумски пожари. Еден голем пожар се протегаше на речиси 30 километри. Противпожарните авиони од Србија, Црна Гора, Хрватска, Романија и Турција одговорија на повикот за помош на земјата.

Бруталниот топлотен бран што ја погоди јужна Европа досега го поштеди Париз, кој треба да биде домаќин на Олимпијадата кон крајот на овој месец. Температурите беа релативно ниски 22 Целзиусови степени во вторникот, иако се очекува да се зголемат подоцна во текот на неделата за повторно да паднат по викендот. (Си-Ен-Ен)