Грчкиот министер Дендијас се криеше од руските ракети во Киев

Грчки дипломати потврдија дека министерот за надворешни работи на земјата, Никос Дендијас, кој е во посета на Украина, бил принуден да се скрие во засолниште за бомби во Киев.

Сирените се огласија додека политичарот разговараше во главниот град на Украина со неговиот колега Дмитро Кулеба.

„Министерот, неговиот украински колега и грчката делегација се добро и се во засолниште за [бомби]“, објави водечкиот грчки дневен весник „Катимерини“, повикувајќи се на дипломатски извори.

Дендијас рано утринава пристигна во Киев, патувајќи во текот на ноќта со воз од Полска. Пред да се прекинат разговорите со Кулеба, тој положи букет црвени рози на Меморијалниот ѕид на паднатите бранители на Украина во знак на почит на мажите и жените кои ги загубија животите од почетокот на руската упад на 24-ти февруари.

Во соопштението од вторникот грчкото Министерство за надворешни работи рече:

„Ова ќе биде трета посета на министерот на Украина по руската инвазија, бидејќи тој веќе двапати ја посети Одеса, град нераскинливо поврзан со хеленизмот“.

Се очекува Дендијас, како што се наведува, да ја повтори пораката дека Грција „го поддржува територијалниот интегритет и суверенитет на сите држави и го осудува ревизионизмот, од каде и да доаѓа“.

Украина со векови е дом на голема етничка грчка заедница. Голем дел од 200.000-членото малцинство е концентрирано во градовите на Црното Море, како што е Одеса, иако пред војната се сметаше дека околу 150.000 етнички Грци живеат само во опколениот град Мариупол.

Обраќајќи се на вчерашната конференција на „Економист“ на Кипар, Дендијас рече дека поради тековните непријателства, линиите на комуникација се прекинати, при што властите во Атина „имаат само делумен пристап“ до Грците од дијаспората.

„Нашата главна грижа останува нивната заштита, како и делењето на правдата за какви било воени злосторства што можеби биле извршени“, рече тој, осудувајќи ја руската „нелегална анексија на украинските територии“.