Гранада: Проширувањето под закана од унгарското и полско вето за миграцијата

Неформалниот самит на Советот на ЕУ е блиску до завршување, а има  мал напредок за работите што треба да се направат за идното проширување. Според зборовите на еден дипломат, станува збор за „правење инвентар, за изготвување на списокот со прашања што треба да се постават пред декември“, кога ЕУ може да ги отвори официјалните преговори за членство со Украина и Молдавија. Европската комисија ќе го објави својот формален и детален извештај за напредокот на овие две земји на 8 ноември. Дали сите 27 земји можат или не да се согласат со секој збор во последното коминике – е дел на кој многумина работат во Брисел.

Во Гранада претходно се појавија извештаи дека лидерите на ЕУ одлучиле  да го напуштат текстот што внимателно го подготвија денеска за да избегнат да им дадат шанса на  Унгарија и Полска да стават вето за заедничкиот пристап за миграцијата. Во друга верзија на истата гласина, лидерите ќе се согласат на текст, но ќе го отстранат ставот за миграцијата. Сè е законско според правилата на ЕУ бидејќи ова е неформален совет каде што не се бараат одлуки или заклучоци.

„Проширувањето не треба да биде заложник на институционални прашања“, рече лидерот на Литванија, Гитанас Науседа, кој  инсистираше на тоа дека одлуките за проширувањето не треба да се заглавуваат во институционални дебати.

„Проширувањето на ЕУ е можност за обединување на континентот. Не треба да стане заложник на институционални прашања. Со оглед на геополитичкото значење на процесот на проширување на ЕУ, прво треба да донесеме одлуки за проширувањето, па дури потоа да зборуваме за институционални реформи. Украина, Молдавија и другите земји треба да постигнат напредок во спроведувањето на реформите и препораките на Европската комисија. Треба правилно да го оцениме овој напредок и да донесеме одлуки за отворање на преговорите подоцна оваа година“, порача тој.