Градот Барселона целосно ги прекинува односите со државата Израел

Градскиот совет на Барселона во петокот одобри декларација за прекин на односите со Израел додека не се постигне траен прекин на огнот во Газа и земјата не ги почитува основните права на палестинскиот народ.

Ова не е првпат Барселона да ја прекине соработката со Израел.

Во февруари 2023 година, тогашната градоначалничка Ада Колау ги суспендираше односите на градот со Израел и договорот за збратимување со Тел Авив.

Сепак, за време на изборите ова лето, Колау го загуби местото од социјалистичкиот кандидат Жауме Колбони. Во септември тој ги обнови дипломатските врски со Израел и договорот за збратимување со Тел Авив.

Овој пат, декларацијата беше претставена од екстремно левичарската партија на Колау, Барселона ен Комун, а беше поддржана од Социјалистичката партија на Колбони, како и од левичарската сепаратистичка партија ЕРЦ.

Декларацијата ги осудува сите напади врз цивилното население, и од Хамас и од Израел, како и „секое колективно казнување, принудно раселување, систематско уништување на домови и цивилна инфраструктура, како и блокада на енергија, вода, храна и медицински материјали за населението на Појасот Газа“.

Според официјалното соопштение на Барселона, главните пречки за траен мир се „окупацијата и колонизацијата на палестинските територии“ и „негирањето на правата“ на народот.