Град Скопје: На пожарникарите им е понуден нов правилник за плата, дијалогот продолжува наредната среда

Претставници на скопските пожарникари денеска на средба со претставници од Градот Скопје и Владата го продолжија социјалниот дијалог за решавање на настанатиот проблем и наоѓање нови решенија за нивните синдикални барања.На состанокот, како што соопшти Град Скопје, на пожарникарите им бил понуден нов правилник за плата и е договорено социјалниот дијалог да продолжи наредната среда.

Една од главните теми за кои се разговарало е како да се стаса до брзи решенија за исплата на додатоците на плата кои се однесуваат на ризикот и опасноста при работа согласно со кои припадниците на противпожарната бригада треба да примаат 20 отсто повисока плата, почнувајќи од 2014 година. Исто така, и за системски решенија кои ќе подразбираат законски измени во Собранието кои ќе овозможат повеќе средства за пожарникарите.

На средбата присуствуваа претставници од ССМ и од Независниот синдикат на пожарникарите, градоначалникот Петре Шилегов, советникот во Владата за труд и социјална политика, Милан Живковиќ и Владимир Ивчев, од Министерството за одбрана.

-Добрата вест е дека политичка волја за надминување на проблемот постои и кај ЗЕЛС и кај Владата, постојат буџетски средства, а постои и дијалог и со ССМ и со Независниот синдикат на пожарникарите. Проблемот е настанат за време на владеењето на претходната власт, но тоа не значи дека оваа власт нема да го реши. Впрочем, тоа и е разликата во начинот на владеење и одговорноста пред граѓаните, додека некои создаваа проблеми, ние ги решаваме, рекол градоначалникот Шилегов.

Шилегов на средбата додаде дека решенија се барале и во периодот пред да почне протестот на пожарникарите, но преку дијалог дошле до заклучок дека ваквите решенија не се доволно брзи и прифатливи за синдикатот заради што заедно со Владата се работи на изнаоѓање нови решенија кои би можеле да стапат во сила уште во текот на овој месец.

– Упатувам огромна благодарност до припадниците на Противпожарната бригада на Град Скопје за покажаното разбирање за комплексноста на проблемот и за подготвеноста преку дијалог да стигнеме до оптимални решенија преку кои ќе бидат зголемени платите и додатоците, дури и пред донесувањето на законските измени во Собранието, истакнал Шилегов по состанокот со пожарникарите.