Големи шумски пожари кај Берлин, проблем се мините

Во сојузната покраина Бранденбург на истокот на Германија денеска повторно се разгореа шумски пожари на вкупна површина од околу 150 хектари, а посебна опасност претставува преостанатата муниција во областа што некогаш служела како воен полигон.

„Во моментов пожарот гори на површина од околу 8 хектари, а останатиот дел тлее“, изјави шефицата на општинската канцеларија за планирање во Јутербог, Кристијане Линднер-Клопш.

За повторно разгорување на пожарот придонесе силниот ветер кој од неделата дува на ова подрачје. Во меѓувреме, противпожарната служба со помош на дронови се обидува да го утврди обемот на пожарот.

Не очекува ситуацијата да се смири
Комесарот на сојузната покраина Бранденбург Раимунд Енгеле не очекува смирување на ситуацијата во наредниот период.

„Малиот дожд што е најавен нема да ја ублажи состојбата. Оваа област со години страда од суша“, рече Енгеле.

Гаснењето на пожарот го отежнува и опасноста од преостаната муниција во оваа област јужно од Берлин, која служела како воен полигон за време на Источна Германија.

Мој проблем
Експертите бараат  пробивање противпожарни патишта низ погодените области, но германските противпожарни служби во моментов немаат опрема за деминирање.

Шумските пожари се чести во областа Бранденбург во последниве години, главно во шумите што беа засадени за време на ГДР за потребите на индустријата за хартија.