Голем штрајк во Грција: Не возат бродови, возови, автобуси…

Бродовите се закотвени во грчките пристаништа, а железнички услуги нема денеска, бидејќи транспортните работници штрајкуваат за да бараат повисоки плати за да се справат со зголемените животни трошоци. Дури и автобусите и таксистите денеска не работат, па многу патишта во центарот на Атина се пренатрупани бидејќи жителите сами се возат на работа.

Возачите се приклучија на 24-часовниот штрајк на најголемиот синдикат на грчкиот приватен сектор, ГСЕЕ, кој вели дека платите на транспортните работници сè уште заостануваат зад оние на нивните европски колеги. Грција овој месец ја зголеми месечната минимална бруто плата за 6,4 отсто на 830 евра, што е четврто такво зголемување во последните пет години, додека земјата закрепнува од децениската финансиска криза.

„Работниците не можат да врзат крај со крај, а цените вртоглаво растат“
Но, работниците велат дека тоа зголемување не е доволно за да бидат во чекор со зголемените трошоци за храна и домување. „Пораката е јасна. Работниците не можат да врзат крај со крај додека земаат најниски плати, а цените вртоглаво растат“, се вели во соопштението на ГСЕЕ, која претставува околу 2,5 милиони работници.

Конзервативната влада на премиерот Кирјакос Мицотакис, која победи на реизборот во јуни минатата година, вети дека ќе ја зголеми месечната минимална плата на 950 евра до 2027 година, кога завршува нејзиниот мандат, и дека ќе ја зголеми просечната плата за повеќе од 25 отсто. до 1.500 евра, до истиот рок.