Ѓоковиќ по голема борба го победи францускиот горостас на почетокот од Ролан Гарос

Новак Ѓоковиќ го започна своето патување на Ролан Гарос со натпревар во првото коло против домашниот претставник и 204 сантиметри висок Џовани Мпетши Перикард. Со победа од 5:7, 7:5, 6:1, 6:4, Ѓоковиќ тргна по својата 25-та титула од Гренд Слем против 83-от играч во светот, познат по еден од најсилните сервиси.

Во второто коло, Ѓоковиќ ќе игра против уште еден Французин, Валентин Ројер, 73-от тенисер на АТП ранг-листата. Победникот од тој натпревар ќе игра во третото коло против победникот од дуелот помеѓу хрватскиот тенисер Дино Прижмиќ и Бразилецот Жоао Фонсека.

Почетокот на натпреварот беше обележан со израмнета борба во која двајцата тенисери самоуверено го држеа својот сервис. Младиот Французин, носен од поддршката од трибините, играше без респект и сервираше одлично. Клучниот момент се случи на 5:5, кога Перикард ја искористи својата можност, го одзеде сервисот на Ѓоковиќ, а потоа сервираше за водство во сетовите, добивајќи го првиот дел со 7:5.

Вториот сет донесе уште поголема борба. Ѓоковиќ го зголеми притисокот врз сервисот на противникот, но Перикард упорно се бранеше. Српскиот тенисер промаши дури шест брејк топки, две кога резултатот беше 3:2 и уште четири во маратонскиот гем кога водството беше 4:3. Французинот спаси уште три брејк топки кога заостануваше со 5:6, но Ѓоковиќ ја искористи четвртата сет-топка и израмни на 1:1 во сетови.

Ѓоковиќ ги доби првите три гема од третиот сет и стекна големо водство. Французинот освои само еден гем во третиот сет. Почетокот на четвртиот сет донесе драма. Ѓоковиќ веднаш го скрши сервисот на противникот, но Перикард неочекувано ја врати истата мерка за 1:1.

Потоа Французинот го доби својот сервис гем, и додека водеше со 2:1, побара кратка медицинска помош, по што го продолжи мечот. Тенисерите потоа ги држеа своите сервиси сè додека резултатот не беше 3:3. Потоа Ѓоковиќ повторно го зголеми темпото, ја искористи можноста и направи клучен брејк за водство од 4:3, што беше одлучувачки момент на мечот. Српскиот тенисер ја одржа предноста во брејкот до крајот на мечот и се избори за второто коло.