Германија одобри 2,7 милијарди евра помош во оружје за Украина
Пакетот ќе биде најголемата испорака на оружје на Берлин до Киев од руската инвазија
Украинскиот претседател Володимир Зеленски слета во Берлин во текот на ноќта додека се обидува да ја зајакне поддршката од клучните сојузници. „Веќе во Берлин“, напиша Зеленски на Твитер кратко по полноќ во неделата, пристигнувајќи од Италија каде што се сретна со италијанските власти и со папата Франциско.
Германската влада одобри нов пакет оружје за Украина во вредност од 2,7 милијарди евра, изјави германскиот министер за одбрана Борис Писториус за новинарите во саботата. Пакетот, првпат објавен од германскиот весник „Шпигел“, е најголемата испорака на оружје на Берлин за Украина од почетокот на војната во февруари 2022 година.
„Сите посакуваме брз крај на оваа ужасна и незаконска војна“, рече Писториус. „За жал, ова сè уште не е предвидливо“.
„Затоа, Германија ќе обезбеди каква било помош што може – сѐ додека е потребно“, додаде тој.
Планираните пратки вклучуваат оклопни возила, беспилотни летала и системи за противвоздушна одбрана, изјави во саботата на Телеграм Андриј Јермак, шеф на кабинетот на украинскиот претседател. Пакетот вклучува и „големп количество муниција“, рече тој.
Новиот пакет ќе биде официјално објавен во недела паралелно со врачувањето на наградата „Карло Велики“ на Зеленски во Ахен, се наведува во извештајот на „Шпигел“. Украина треба да ја добие опремата во наредните недели и месеци, се вели во медиумот.
Украинскиот министер за надворешни работи Дмитро Кулеба им кажа на своите колеги од ЕУ на состанокот во Стокхолм дека на Украина ѝ треба поголема поддршка за да се одбрани од руската инвазија, изјави во саботата шефот за надворешна политика на ЕУ, Жозеп Борел.
Околу борбите во Бахмут, „На Украина ѝ се потребни околу 1.000 гранати артилерија дневно“, изјави Борел за новинарите по состанокот на министрите за надворешни работи.