Франција ќе го забрани пушењето на плажите, во парковите, шумите и во близина на училиштата

Франција ќе го забрани пушењето на сите нејзини плажи, како и во јавните паркови, шумите и во близина на училиштата, откако претседателот Емануел Макрон вети дека ќе ја создаде „првата генерација непушачи“ до 2032 година, пишува „Гардијан“.

„Од сега па натаму, местата за непушачи ќе бидат норма“, изјави францускиот министер за здравство Орелиен Русо.

Во Франција веќе има 7.200 области без тутун, вклучувајќи ја и Ница на француската ривиера, која прва воведе забрана за пушење на плажа во 2012 година со одобрение на Француската лига за рак.

Ќе се зголемат и даноците за цигарите
Но, централната влада ќе воведе забрана на национално ниво наместо поединечни локални власти да одлучуваат за областите без чад.

„Сега ја префрламе одговорноста и воспоставуваме принцип што ќе стане правило“, рече Русо.

Ќе се зголемат и даноците за цигари, пакетче од 20 цигари, сега по цена од околу 11 евра, ќе се зголеми на 12 евра до 2025 година и на 13 евра во 2026 година.

Владата, исто така, сака да ги забрани електронските цигари за еднократна употреба, за кои Русо рече дека се особено популарни меѓу младите луѓе и имаат големо влијание врз здравјето и животната средина.

Откако во 2008 година беше забрането пушењето во француските барови и ресторани, анкетите покажаа дека француската јавност ја одобрува таквата одлука.

Забрана за пушење во Париз

Но, тутунот продолжува да предизвикува 75.000 смртни случаи кои може да се избегнат во Франција секоја година, а француската полиција се справува со она што владата го нарече „експлозија“ на шверцувани цигари.

Емануел Грегоар, левичарскиот заменик-градоначалник на Париз, рече дека главниот град бил пред владата во поставувањето на стотици зони без чад низ градот, вклучувајќи јавни игралишта и области во близина на училишта, градинки и спортски центри.

Многу градови во Франција веќе имаат одредени места за непушачи на нивните плажи

Десетици градови во Франција назначија плажи за непушачи во последниве години, вклучувајќи го Сен Лоран-ду-Вар на Азурниот брег, како и Сен Мало и Бијариц. Исто така, постои зголемена загриженост за влијанието врз животната средина на отпушоците оставени на плажите, што е втор најголем проблем со отпадот во крајбрежните области по пластичните шишиња.

Во Кан, кој го забрани пушењето на два мали дела од своите плажи, десничарскиот градоначалник Дејвид Лиснард ја доведе во прашање забраната на владата за пушење на плажите.

„Многумина ќе аплаудираат, но не и јас. Мислам дека веќе има доволно ограничувања на слободите. Кој ќе се погрижи забраната да се почитува? Може да падне во рацете на градоначалникот“, напиша Лиснард на социјалната мрежа „Икс“.

Францускиот орган за јавно здравје соопшти дека минатата година во Франција имало речиси 12 милиони дневно пушачи. Речиси 32 отсто од луѓето на возраст од 18 до 75 години рекле дека пушат, а 25 отсто рекле дека пушат секојдневно.