Франција ја доби најдесничарската влада во последната деценија

Францускиот претседател Емануел Макрон ја именуваше новата влада предводена од премиерот Мишел Барние, која ја врти политиката надесно 11 недели по парламентарните избори.

Првата главна задача за Барние, назначен пред повеќе од две недели, ќе биде да поднесе буџетски план за 2025 година, кој се однесува на финансиската состојба на Франција, што премиерот оваа недела ја нарече „многу сериозна“.

Барние, конзервативец, е меѓународно најпознат по тоа што ги водеше преговорите за „Брегзит“ во име на ЕУ.

Опозициските политичари од левицата веќе рекоа дека ќе го предизвикаат кабинетот, најавен во саботата навечер, со предлог за недоверба.

На изборите во јули, левичарскиот блок наречен Новиот народен фронт (НФП) освои најмногу парламентарни места од кој било политички блок, но не доволно за севкупно мнозинство.

Макрон тврдеше дека левицата нема да може да собере доволно поддршка за да формира влада која нема веднаш да биде соборена во парламентот.

Наместо тоа, тој се сврте кон Барние за да ја предводи владата која главно се потпира на парламентарната поддршка од сојузниците на Макрон, како и од конзервативните републиканци (ЛР) и центристичките групи.

Макрон сметаше и на неутрален став од екстремната десница – но лидерот на Националниот собир (РН), Жордан Бардела, побрза да го осуди составот на новата влада.

Тоа означи „враќање кон макронизмот“ и затоа нема „никаква иднина“, рече тој во саботата.

На другиот крај на политичкиот спектар, левичарот Жан-Лук Меланшон го нарече новиот состав „влада на губитниците на општите избори“. Франција, рече тој, треба „да се ослободи“ од владата „што е можно поскоро“.

Барние заврши со влада која вклучува мешавина од функционери од минатата администрација, неколку конзервативни новодојденци и првпат именувани центристи.

Земени заедно, тоа е „најдесничарската влада од администрацијата на Фијон под претседателството на Никола Саркози“ пред повеќе од една деценија, рече ветеранот политички коментатор Ален Духамел на информативниот канал БФМпо објавувањето на владата.

Едно од најзначајните назначувања е Бруно Ретајло – посветен конзервативец познат по неговите тврдокорни ставови за имиграцијата што во минатото доведе до обвинувања за расизам – како министер за внатрешни работи. Неколку истакнати сојузници на францускиот претседател Емануел Макрон изразија загриженост за потенцијалното назначување на Ретајло, откако се појавија гласини дека тој ќе ја добие функцијата министер за внатрешни работи претходно оваа недела. Меѓу нив беше и Ен Женет, која беше именувана за министерка за образование.

Новиот министер за надворешни работи, Жан-Ноел Баро, е член на центристичкото Демократско движење, сојузник на Макрон и син на поранешниот европски комесар Жак Баро. Тој претходно беше помлад министер за европски прашања на Франција.

Новиот помлад министер за европски прашања е Бенжамин Хадад, 38-годишен сојузник на Макрон и поранешен висок директор на тинк-тенкот Атлантски совет со седиште во Вашингтон. (Ројтерс)