(Фото) Цело Скопје на промоција кај Ѕоф: „Цепај сине“ е за „ствари што нит’ сте ги чуле нит’ сте ги виделе“

Авторот на бестселери Зоран Спасов-Ѕоф, синоќа, во „Станица 26“, го собра цело урбано Скопје на интергалактичката промоција на новата книга „Цепај сине“. Во улога на водител блескаше Александар Микиќ, а за убавата атмосфера се погрижија специјалните гости-  легендарниот Драган Мијалковски и групата „The Ringtones“.

 
„Цепај сине“ е во издание на „Попули“, дел од „Арс Ламина – публикации“. Се работи за толковен заебантски речник во манирот на претходната книга на Зоран Спасов-Ѕоф – „Џабе живиш у Скопје“.

Како што вели авторот во описот на книгата: „Стануе збор за еден цепенковистички зборник што кај читателот треба да побуди шегобијни чу’ства, осеќаји, сенсои и филинзи. Ќе прочитате ствари што нит’ сте ги чуле нит’ сте ги виделе. За некои ќе треба да ги прашате вашите родители, доста од нив не постојат ни на ’Гугл‘, а најголемиот дел се непознати чак и за Институтот за македонски јазик. Но, едно е сигурно – или ќе ’цепате‘ или (нема да) живеете“.

 
Во оваа книга се застапени две илјади поими, изрази и фрази што на шеговит начин ги претставуваат нашите хумор и менталитет. Целта на авторот е да го реактуализира скопскиот јазик и кај читателите да разбуди некои одамна заборавени чувства.

Средствата од продажбата, како и досега, Зоран Спасов-Ѕоф ќе ги донира во хуманитарни цели.

 
На оваа ѝ претходат уште пет хит-книги: „Џабе живиш у Скопје“, „Торонто експрес“, „Тито, мојот претпоследен херој“, „Некогаш, некаде“ и „Тибам штркот“.

Зоран Спасов-Ѕоф е познат бизнисмен и основач на повеќе електронски медиуми, сопственик на една од најголемите и највлијателни медиумски групации кај нас и пошироко „Clip Media Group“, основач на фондацијата „Македоника“, на првиот приватен весник во Македонија „Огласник М“ и на првиот таблоид „MExpress“. Беше продуцент на ТВ-шоуто „Џандар збира“, а во 1995 година беше избран за менаџер на годината во полето на културата.

Фото: Фејсбук на Литература.мк