Финска бара помош: Да се спречи Русија да користи илегални мигранти

Финскиот премиер Петери Орпо побара помош од ЕУ за решавање на проблемот со приливот на мигранти преку Русија и економските последици од затворањето на границите на истокот на земјата.

„Мораме да најдеме заеднички решенија за да ја спречиме Русија да користи илегални имигранти против нас. Го подготвуваме нашето законодавство, но ни требаат и мерки на ниво на ЕУ“, рече Орпо, кој денеска го посети финскиот град Лапеенранта и граничниот премин заедно со претседателката на Европската комисија, Урсула фон дер Лајен.

Орпо додаде дека источните области на Финска настрадале поради однесувањето на Русија и затворањето на границите и дека им е потребна помош од ЕУ, објави финскиот јавен сервис Yle.

„Сакаме ЕУ да создаде нов финансиски инструмент за источна Финска и погодените области“, рече финскиот премиер.

Финска ја затвори границата со Русија минатата година поради зголемениот прилив на мигранти од земји како Сирија и Сомалија, од кои многумина доаѓаат преку Русија. Хелсинки ја обвини Москва дека ја користи миграцијата како оружје против Финска и ЕУ, што Кремљ го негираше.

Претседателот на ЕК рече дека претседателот на Русија, Владимир Путин, сега „се фокусира на Финска“ поради нејзината поддршка за Украина и пристапувањето во НАТО, наведувајќи ја како пример руската инструментализација на миграцијата.

„Ова не е само за безбедноста на Финска, туку и за безбедноста на Европската унија. Ние сме во ова заедно… ЕУ е тука да ве поддржи во вашите напори“, рече Фон дер Лејен.

Таа посочи дека Финска делуваше решително и успешно во борбата против оваа закана и дека ЕУ може многу да научи од Финска кога станува збор за безбедноста, соопшти Европската комисија.

„Треба да бидеме повеќе како Финците кога станува збор за безбедноста. Имаме многу да научиме од Финска и од финскиот модел на подготвеност на сите нивоа на општеството. Ова ви овозможува адекватно да одговорите на различни видови кризи и тоа е она што го прави општеството навистина еластично, рече Фон дер Лејен.

Европската комисија, потсети Фон дер Лајен, заедно со Фронтекс обезбедува финансиска и оперативна поддршка за Финска и соработува со земјите на потекло на мигрантите со цел да се преземат соодветни мерки.

Претседателот на ЕК рече дека во спроведувањето на мерките за решавање на приливот на мигранти од Русија, важно е да се најде баланс меѓу обезбедувањето на надворешните граници и почитувањето на меѓународните обврски.

Кога станува збор за негативното економско влијание на руската инвазија врз пограничните региони на Финска, Фон дер Лајен рече дека Финска покажала „огромна издржливост“.

„Сакам да ја пофалам вашата непоколеблива поддршка за Украина, и покрај влијанието на конфликтот врз вашиот бизнис, семејствата и пријателите. Затоа сакам да истакнам дека ЕУ е тука да ви помогне. Ревитализацијата на овие региони на источните граници на Финска е владин приоритет и го поддржуваме“, рече претседателот на ЕК.