Филков го плаќа цехот за хаотичната политика околу правосудството

Само што стивна Кочани, почна да врие во политичките кругови,  каде што почнуваат подготовки за локалните избори. Покрај првите политички пукнатини во коалицијата Вреди, што навестуваат нејзин можен распад, „пукна“ и на релација меѓу ВМРО-ДПМНЕ и ЗНАМ, преку кавгата на пратеникот Антонио Милошоски со министерот за правда Игор Филков.

Откако Милошоски го нарече Филков „слаб“ министер, тој му возврати со прашање „за кого одработува сега“ и со обвинување – дека токму тој е еден од заслужните за кризата со правосудниот систем.

Поентата од сите овие превирања е дека почна политичко престројување пред изборите, а во тие рамки и барање кој да биде виновен што владата не покажа никаков резултат во реформата на судскиот систем, или попросто кажано – се бара кој да биде крив за тоа. Иако е општ впечатокот дека Филков е најневидливиот министер за правда досега и дека не е на ниво на задачата што ја доби, не може да се избега од впечатокот дека за состојбите во правосудството тој беше последен што се прашуваше во владеечката коалиција, односно политиката во овој ресор ја водеше премиерот Христојан Мицкоски со секојдневни изјави на оваа тема. Сега, кога дојдоа резултатите, односно кога се виде дека од се што ветија на изборите и во ЕУ ништо не е остварено, па не можат ни да го сменат јавниот обвинител  без оглед колку се силеа кон него, дојде време да и се погледне на вистината во очи. А, вистината е дека место реформи  во правосудството има хаотични процеси, а доцнењето на законите може да ги закочи и милионите на кои смета Македонија од Планот за раст на ЕУ.  

Денес и лидерот на СДСМ, Венко Филипче, се приклучи на тие што не гледаат успех во работата на Филков, поточно на Владата воопшто во однос на реформите. Според него, од 35 закони што оваа влада се обрза дека ќе ги спроведе до јуни, поминат е само еден, а другите воопшто не се ни во процедура во Собранието, при што најголемиот број се од областа на правосудството. 

„Владата потпишала и се обврзала дека ќе усвои 35 закони до јуни 2025 година, од кои најголем број се од Министерството за правда, а другите од Министерството за дигитализација и еден од Министерството за култура. Освен еден, околу дигитализацијата, ниту еден друг не е во собраниска процедура. Знаете дека реформската агенда е поврзана  со 800-те милиони евра наменети за Македонија во рамките на Планот за раст на ЕУ, што ќе ги добиеме откако ќе ги оствариме реформите. Ништо не е во процедура според временската рамка што ја потпишала Владата  и се обврзала дека така ќе биде. Тоа значи сериозно потфрлање во реализацијата на реформската агенда“, изјави Филипче на прес конференција. 

Премиерот Христијан Мицкоски кавгата, сепак, ја сведе на „лош ден“ за двајцата политичари. 

„Пратеникот на ВМРО-ДПМНЕ, Антонијо Милошоски и минситерот за правда, Игор Филков, вчера имале лош ден. Се надевам дека тој лош ден заврши и за едниот и за другиот“, рече  Мицкоски. „Милошоски е дел од мојот најблизок периметар, тој е додадена вредност во рамките на партијата. Соработката со Милошоски ја оценувам на највисоко ниво“, рече Мицкоски и додаде: „Знам со какви проблеми се соочил министерот Игор Филков и знам каква состојба затекнал. На дневна основа се координираме и соработуваме во делот на реформите. Можам да заклучам и се надевам дека ова ќе остане на два лични ставови, дека секој има право на лош ден и се надевам дека тој лош ден заврши и за едниот и за другиот“. Според него, Владата е стабилна и граѓаните треба да бидат спокојни.

Тој исто така уверуваше дека не чувствува дека постојат какви било проблеми и во релациите со коалицијата на Арбен Таравари.

 „Не, немам такво чувство. Напротив, имаме исклучителна соработка. Граѓаните да бидат сигурни, Владата е стабилна, повеќе од две третини неофицијално, а официјално 78 пратеници ја поддржуваат оваа Влада. Граѓаните, според она што го гледам од анкетите даваат поддршка, огромно е позитивното мислење дека и Македонија се движи во позитивна насока и тоа претставува за нас инспирација да продолжиме понатаму да се движиме и да работиме“, уверуваше Мицкоски.

Филков вчера се бранеше со список на закони кои, како што тврдеше, се подготвени иако не се во Собранието. Притоа ги спомена Законот за спречување на корупција и судир на интереси (подготвен и објавен на ЕНЕР), Предлог закон Закон за судска служба – подготвен и објавен на ЕНЕР и  Предлог закон за платите на јавните обвинители што Министерството за правда го доставило до Влада во септември 2024 година, но бил одложен поради немање финансиска согласност од ресорното министерство.  Натаму ги наброја  Законот за јавно обвинителство (подготвен е и ќе се објави на ЕНЕР) и  Закон за Судски совет , кој треба да се донесе до јуни 2025, а моментално според него е во завршна фаза и  по преводот  ќе се испрати на мислење на Венецијанска комисија и Европска комисија.

Според Филипче станува збор за осетливи закони, а од нив зависи и најмногу оценката на ЕУ за реформите во Македонија. Иако оваа Влада е само девет месеци на позицијата, локалните избори очигледно ја наметнаа потребата да се испитаат резултатите од функционирањето на заедничката коалицијата, шпри што од месечината се гледа дека кадрите на ЗНАМ не покажуваат капацитет, а кадрите на Вреди не се ни половина добри како тие на ДУИ додека беа на власт. (С.Ј.)