Филипче најави забрзано тестирање и резултати за еден ден

Министерот за здравство Венко Филипче, најави дека ќе овозможат забрзано тестирање за присуство на вирусот корона, па пациентите нема да мора долго да чекаат на резултати.

Како што појасни Филипче, се трудат тестирањето да го спроведат веднаш, а резултатите да пристигнуваат најдоцна по 24 часа.

Според него, лабораторијата во МАНУ не е конципирана за ваков тип работа, но дека се трудат да ги забрзаат тестирањата.

Филипче рече и дека во земјава веќе пристигнуваат најавените донирани тестови кои се дистрибуираат по лабораториите.

Дека многу се чека на резултатите од тестовите се пожалија повеќе граѓани, а последен е синот на денеска починатиот маж од Велес, кој чека на резултати од контролниот тест кој треба да докаже дека е веќе оздравен. Тој се жали дека поради тоа нема да биде во можност да присуствува на погребот на својот татко.

Министерот за здравство Венко Филипче најави дека во текот на неделата во функција ќе се стават две дополнителни лаборатории – лабораторијата во МАНУ и во Институтот за судска медицина со што ќе се скрати времето на чекање на резултатите од тестовите за корона вирусот.

-Со ова капацитетот на бројот на тестирања во текот на денот се зголемува за 50 до 100 со што практично ќе се елиминира долгото чекање на резултати, со оглед на големиот број брисеви што стигнуваат во лабораторијата на ИЈЗ, рече Филипче на денешната прес-конференција во Владата.

Во одговор на новинарско прашање појасни целта е да се скрати времето на чекање и резултатите да се добиваат за еден ден, односно 24 часа.

-Тоа што сега се обидуваме со двете лаборатории особено со таа во МАНУ, е практично во еден ден да се добиваат сите резултати од сите болници надвор од Скопје со систем на транспорт. Во таа смисла ќе се транспортираат материјалите на сите пациенти кои што се собрани во текот на претходниот ден и утрото ќе се испратат во лабораторијата за да може во една или најмногу во две тури да се изработат резултатите. Според информациите  што ги собравме утрово, а согласно просечниот број што го имаат болниците каде доаѓаат пациентите за дијагноза во Прилеп, Битола итн. сметаме дека овој капацитет од 50 на 100 на ден е доволен, рече Филипче.

Во моментов се прави рече и реорганизација на лабораторијата во МАНУ, која не е дизајнирана за ваков вид дијагноза, а очекува до среда најдоцна четврток овој систем да биде подготвен, односно чекањето на резултатите да се сведе на 24 часа.

Филипче најави и спроведување на скрининг во Дебар со оглед дека таму веќе нема новозаболени, а сите пациенти заздравуваат, за што ќе биде искористена донацијата од 20.000 тестови за скрининг за антитетела.

-Ќе направиме еден скрининг во бројка од 20-30 отсто од вкупното население во регионите во кои досега имаше мерки на рестрикција на движење воведени уште пред вонредната ситуација со што сакаме да направиме скрининг на населението и да се процени имунитетот, што ќе биде одличен пример за тоа што би можеле да очекуваме и на ниво на целата држава во оној момент кога ќе одлучиме дека треба да се прави таков скрининг со антитела согласно времето на епидемијата, односно времето во кое се наоѓаме на епидемиолошката крива, посочи Филипче..

Додаде дека веќе е направен и распоредот за делење на еден милион заштитните маски донирани од Чешката Република, кои ќе бидат дистрибуирани до сите установи согласно нивната потреба.

Кон крајот на оваа недела се очекува да стигне и помошта од САД. во заштитна опрема, која, исто така ќе биде соодветно дистрибуирана или ќе бидат надополнети резервите во Министерството за здравство.

Инаку, во изминатите 24 часа на Инфективната клиника во Скопје починале четири лица, има 26 нови случаи, со што вкупната бројка на дијагностицирани пациенти е 854, а вкупен број тестирања изнесува 8.552. Имаме и тројца оздравени, кои се лекуваа во Штип под контрола на локалните инфектолози.

Во однос на починатите лица, Филипче појасни дека тоа се пациенти со навистина тешка форма на болеста на возраст од 79, 58, 63 и 67 години.

На Инфективната клиника во Скопје примени се тројца нови пациенти со што нивниот број е вкупно 68, а осум од нив се на механичка вентилација. Во тек е и доопремување на Мобилната болница која располага со 100 легла, која, рече, за два дена треба да биде ставена во функција. Со тоа, според Филипче, ќе се дуплира капацитетот на Инфективната клиника.

Во болница „8 Септемрви“, информира Филипче, хоспитализирани се 31 пациент, од кои на респираторна машина се шест пациенти. Во Битолската болница хоспитализирани се пет пациенти кои се во стабилна здравствена состојба нема тешка слика болеста, а во Штип се хоспитализирани девет пациенти.