Филипче контра реисот: Корона вирусот не е мртов

Венко Филипче денеска на својот профил на „Фејсбук“ го демантираше Реисот Сулејман Реџепи дека вирусот бил мртов. Ниту е мртов, ниту е заминат, напиша Филипче.

„Коронавирусот ниту е мртов ниту е заминат. Тој е тука и за жал, проблемот ќе се провлекува се додека има такви кои го игнорираат. Многу пати повторив, но еве уште еднаш ќе кажам. Здравствените работници не можат сами. Мерките се добри и навремени, но тие функционираат само ако се почитуваат, во спротивно немаат ефект. Почитувањето на мерките и ефектите од нив зависат само од нас како граѓани. Едноставно мора да се прифати новиот начин на живот, мора нашето секојдневие да го прилагодиме почитувајќи ги препораките.“, напиша Филипче.

Според него, загрижувачки се фотографиите кои во текот на вчерашниот ден се појавија на социјалните мрежи, каде што се гледаат многу луѓе како празнуваат во верски храм. Тој истакнува дека и покрај апелите да нема масовни собирања, тоа не се случило.

„Фотографиите и прилозите од вчерашното празнување во верските храмови и пред нив се повторно загрижувачки. И покрај апелите на здравствените институции да нема масовни собирања, да се почитуваат мерките за држење дистанца и ограничувањето на движењето, тоа не се случи.

Го почитувам празнувањето и силно верувам дека тоа се значајни настани за сите нас, независно на која вера припаѓаме. Но, оваа година празниците во целиот свет се празнуваат на еден поинаков начин, ставјаќи го сопственото здравје и на нашите сограѓани пред се и над се.Им благодарам на граѓаните кои се придржуваат кон мерките, а кои за жал, понатаму можат да бидат изложени на ризик поради оние коишто тоа не го прават.“, напиша Филипче.