Филипче: Директорката на Кожната клиника ќе биде разрешена

Министерот за здравство Венко Фiлипче најави дека директорката на Клиниката за дерматовенерологија, која е заразена од корона вирус, а за тоа не извести навремено, ќе биде разрешена од функцијата директор, а на нeјзино место ќе биде назначен в.д. директор.

Како што појасни Филипче на прес-конференцијата во Владата, тој разговарал со претседателката на ДКСК, во врска со ставот на Антикорупциска дека случајот со директорката на Клиниката за кожни болести не е поврзан со избори и нема проблем за нејзино разрешување. Претседателката на ДКСК му укажала на оваа можност дека кога има ваква итност може да се направи тоа.

– Ние тоа ќе го направиме денеска и ќе се назначи в.д. директор, истакна Филипче. 

Инаку, стотина лица се во изолација кои присуствувале на симпозиумот минатиот викенд, 64 вработени од Клиниката, околу 24 пациенти, тоа е дополнителен број на оние што беа претходно. Другите луѓе кои беа во изолација кои досега немаат симптоми се практично сопатници на првата пациентка, тоа се 12 луѓе и тие во текот на денешниот ден или утре ќе бидат посетени, прегледани и ќе биде констатирано дали треба да се тестираат од страна на локалните епидемиолози, информираше министерот за здравство Венко Филипче, одговарајќи на новинарско прашање.

Според него, капацитетите на Клиниката за инфективни болести се целосно подготвени, каде има осум изолирани боксови во кои има респираторни машини. Досега ниту еден од пациентите, посочи, нема таква здравствена состојба, клиничка манифестација што бара да биде поставен на респираторна машина.

– Во тек е набавката и веќе се лоцирани тука во државата уште два апарати кои може практично веднаш да бидат инсталирани, уште дополнителни пет во следниот период. Тоа не е проблем, предизвик што не може да го решиме со оглед на тоа што и самата Клиника веќе има направено акциски план за ослободување на болнички капацитети незадолжително за респираторна машина, туку и за пациентите на кои тоа не им е потребно. Значи, само болнички кревети. Веќе се ослободи едно крило, дополнително одделение, освен тоа кое иницијално служи за изолација и веќе предвидоа колегите и вчера имавме дискусија за оваа работа како доколку има прогресија со зголемување на бројот кои капацитети ќе се користат. Засега со оглед на тоа што експертизата е тука сконцентрирана на едно место на Клиниката за инфективни болести, тука се планирани да бидат концентрирани сите пациенти, рече Филипче.

Потенцира дека ќе ја следат ситуацијата, може препораката да се смени, да се заостри или некоја друга мерка да се воведе во кој било од следните денови.

Во однос на матурантите, Филипче појасни дека разговарале со министерот за образование, тие ќе разговараат во рамките на надлежностите на МОН за некаква форма на скратување на програмата или нешто што може да се работи онлајн, меѓутоа со таа мерка ќе излезат во текот на следниот ден или кога ќе биде подготвено.

– Ги прекинуваме сите автобуски организирани линии не само кон Италија, туку кон сите земји што се во највисокоризичната зона според СЗО. Тоа се Италија и Франција, додаде Филипче.