„Фајненшел тајмс“ за Бугарија: Сиромаштија, корупција, ГЕРБ и уморни избирачи

„Одиме уште еднаш“ – под овој наслов денеска лондонски „Фајненшел тајмс“ ја опишува ситуацијата во која Бугарија повторно оди кон предвремени избори.

Краткиот текст од Мартон Дунај, дописник од Југоисточна Европа, е во билтенот, кој ги ориентира читателите кон претстојните настани на неделата. Во поднасловот на билтенот пишува: „Уште едни избори во невладеливата Бугарија“.

Авторот посочува дека речиси точно две години по изборите во 2021 година, кои требаше да го пензионираат Бојко Борисов и да бидат победа против корупцијата по неколкумесечните протести против него, работите не успеале и Бугарите ќе мора да одат да гласаат по петти пат.

„Постојани фактори се континуираната сиромаштија и постојаната корупција. Друг фактор е моќта на ГЕРБ, која контролира над 20 отсто од гласовите, што е доволно за да биде прв или втор [на изборите]“, напиша Дунај. Трет постојан процес е постепеното издигнување на „проруската екстремна десница, која е поттикната од регионалните конфликти како што се патриотските спорови со Северна Македонија“.

Според него, политичкиот терен е фрагментиран и често претрпува драстични промени, при што лидерите се обидуваат и не успеваат да соберат стабилен тим заедно или против ГЕРБ, додека политичките ѕвезди се креваат и паѓаат лево и десно.

„Во меѓувреме, се чини дека радоста на 2021 година заврши со вознемиреност: една третина од Бугарите се потрудија да излезат на гласање последен пат во октомври“, заклучува авторот.