Европските дипломати одбија да се фотографираат со Лавров на состанокот на Г20
Откако стана извесно дека скандалот ќе биде голем Марко Рубио ја откажа групната фотографија во Атланта
Европските дипломати одбија да учествуваат во официјално фотографирање со рускиот министер за надворешни работи, Сергеј Лавров, за време на состанокот на Г20 во Атланта, САД. Како резултат на тоа, американските домаќини го откажаа традиционалното групно фотографирање на претставниците од сите земји учеснички, пренесува Би-Би-Си.
Фотографирањето беше закажано за петок наутро, а Обединетото Кралство беше меѓу земјите што одбија да учествуваат.
„Обединетото Кралство, уште од почетокот на инвазијата врз Украина, спроведува долгорочна политика на избегнување директни билатерални средби со руски министри и немаме намера тоа да го промениме“, изјави британскиот министер за надворешни работи, Ед Милибанд.
Еден американски функционер објасни дека фотографирањето било откажано откако станало јасно дека некои делегации не сакаат да позираат заедно.
„Наместо да дозволат едно церемонијално фотографирање да стане дипломатска пречка, САД одлучија да се откажат од фотографирањето и да се фокусираат на суштински дискусии“, рече тој.
Состанокот на министрите за надворешни работи на Г20 беше организиран од американскиот државен секретар Марко Рубио. Украина, која не е членка на групата, овој пат не беше поканета, иако учествуваше на слични состаноци во претходните години.
Односите меѓу Киев и Вашингтон се особено затегнати по несогласувањето меѓу украинскиот претседател Володимир Зеленски и Доналд Трамп во врска со украинските напади врз руската нафтена инфраструктура.
Во исто време, односите меѓу САД и Русија покажаа одредено подобрување. Трамп привремено укина дел од санкциите кон Москва и се согласи на увоз на руски дизел на американскиот пазар, со цел да ги намали цените на горивата пред изборите на средината на мандатот, кои се одржуваат на почетокот на ноември.
Украина и нејзините европски сојузници остро го критикуваа овој потег. Зеленски го нарече договорот „подарок“ за Владимир Путин и „инвестиција во војна што треба да се заврши, а не да се продолжува“.
Трамп објасни дека суспендирањето на дел од санкциите претставува обид Русија да се задржи на преговарачката маса.