Европскиот суд донесе одлука: Ништо од патарините во Германија

Европскиот суд на правдата денеска донесе одлука според која воведувањето патарини во Германија е противзаконско бидејќи неправедно се казнуваат возачите од другите земји членки на ЕУ. Одлуката на судот, со седиште во Луксембург, значи дека Германија ќе мора да го отфрли или да го измени системот за наплата на патарини.

Германскиот предлог-закон предвидуваше сите корисници на автопатиштата да плаќаат патарини, но на германските жители да им се вратат дадените средства преку поврат на данок.

Австрија и Холандија поднесоа тужба против предлог-законот пред Европскиот суд на правдата тврдејќи дека Германија ги прекршува правилата на Унијата и ги дискриминира другите жители на ЕУ.

„Одлуката е дискриминаторска затоа што економскиот товар на давачката паѓа само на сопствениците и возачите на возила регистрирани во други земји членки на ЕУ“, одлучи судот во Луксембург.

Според планот, странските и домашните возачи во земјата ќе мораа годишно да плаќаат 130 евра за користење на автопатите, но беа предвидени и вињети за покуси периоди, од 10 дена и два месеца со помала цена.