Европскиот парламент „длабоко жали“ што Србија не воведува санкции за Русија

Европскиот парламент длабоко жали за непочитувањето на санкциите на ЕУ против Русија од страна на Србија и посочува дека непочитувањето на надворешната политика на ЕУ му штети на процесот на пристапување на Србија во ЕУ, се вели во нацрт-резолуцијата за Украина што треба да се гласа подоцна во вторникот во Европскиот парламент.

Нацрт-резолуцијата за руската агресија врз Украина, до која дојде „Еурактив“, повторува дека се очекува земјите кандидати да се усогласат не само со acquis communautaire, туку и со нивната заедничка надворешна и безбедносна политика.

Европскиот парламент со голема загриженост ги забележува постојаните напори на Руската Федерација за дестабилизација на земјите од Западен Балкан и попречување на нивните демократски процеси, се вели во текстот.

Парламентот ги осудува оние кои изразија поддршка за Русија по нејзината агресија врз Украина и ја пофали поддршката на земјите од Западен Балкан, кои се евроатлантски сојузници.

Резолуцијата остро ја осудува руската воена агресија врз Украина, како и вмешаноста на Белорусија, и ја повикува Москва веднаш да ги прекине сите воени активности, да ги повлече воените и паравоените сили и опрема од целата меѓународно призната територија на Украина.

Од Русија се бара целосно да го почитува територијалниот интегритет, суверенитет и независност на Украина во нејзините меѓународно признати граници.