Еврообврзница: Македонија се задолжи 700 милиони евра со камата од 3,675 отсто
Македонија денес ја издаде седмата еврообврзница во износ од 700 милиони евра, соопшти попладнево Министерството за финансии на интернет страницата на министерството.
Рочноста на еврообврзницата е 6 години, додека каматната стапка по која е издадена изнесува 3,675 отсто, што е втора најниска камата, веднаш по еврообврзницата издадена во 2018 година.
„Ова ја покажува довербата на инвеститорите во македонската економија и политики, ако се земе предвид дека оваа обврзница се издава во време Ковид-19 кризата – најголемата економска криза после Големата депресија, кога сите економии, вклучително и светските економски сили, излегуваат на меѓународниот пазар на капитал за да обезбедат средства за финансирање на потребите за кризата“, велат од Министерството.
Од таму додаваат дека интересот на странските инвеститори за македонската еврообврзница беше 5 пати поголем од износот кој беше издаден.
„Ова е уште еден податок, покрај поволната каматна стапка, што укажува на доброто позиционирање кај странските инвеститори и нивната доверба во земјава. Ова се должи на макроекономската и финансиска стабилност, како и нашата посветеност и успехот постигнат последниве години во евроатланските интеграции“, нагласувааат од Министерството за финансии.
Со издавањето на еврообврзницата и заемот од Меѓународниот монетарен фонд во износ од 176 милиони евра и заемите од Светска банка во износ од 140 милиони евра и од Европската унија од 160 милиони евра кои се преговараат и се извесни, се затвора финансиската конструкција за потребите годинава, односно дефицитот проектиран на 6,8 отсто од БДП со ребаланс, обврските по основ на стари долгови од 705 милиони евра. Дополнително, се обезбедуваат и сигурносни средства за справување со евенутален повторен шок и зависно од развојот на настаните делумно финансисрање на потребите за следната година, соопштија од министерството на нивната интернет страница.
Земјава на меѓународниот пазар на капитал има излезено седум пати досега, вклучувајќи ја и денешната издадена еврообврзница. Првата еврообврзница е издадена во 2005 година, потоа 2009, 2014, 2015, 2016, 2018 и сега во 2020 година. Најниска камата од 2,75% има еврообврзницата од 2018 година, додека највисока во 2009 година од 9,875 отсто, но мора да се напомене дека тоа е во време на светска економска криза.