Еврејската заедница бара да не биде инволвира во кампањата преку политички спотови

Еврејската заедница денеска преку соопштение реагира на, како што велат, нејзино инволвирање во политичка кампања преку рекламни спотови на политички партии. Иако не наведува директно за кој спот се работи, може да се претпостави дека оваа реакција се однесува на она што го сними Игор Дурловски, носителот на кандидатската листа на ВМРО-ДПМНЕ во ИЕ5. Дурловски во политичкиот спот се залага на меморијален парк и поставување на сончев часовник на Еврејските гробишта во Битола.

„Во изборната кампања која е во тек, се појавија рекламни спотови на политички партии кои ја инволвираат Еврејската заедница  во политичка кампања, злоупотребувајќи ја историја на Евреите во државава, задираат во суверените права и интимата загарантирани со Уставот на Република Северна Македонија како една од петте признаени верски заедници. Еврејската верска заедница е непартиска и неполитичка заедница која се грижи и го негува во континуитетот верскиот живот, традицијата и обичаите на Евреите кои повеќе од два милениума живеат на овие простори. Суверено право на секој граѓанин е да биде активен политички чинител, да гласа и да биде избран, но истакнуваме дека Еврејската заедница и еврејското наследство во Република Северна Македонија не смее и не може да биде никогаш дел од ничии политички кампањи ниту пак рекламерски патриотизам“, се вели во соопштението од Еврејската заедница.

Патриотизам, додаваат од Еврејската заедница, е почит, лојалност, посветност и љубов кон сопствената држава и сопствениот народ, да се работи за доброто на сите, притоа, разбирајки ги заложбите и вољата и на најмалите заедници. Членовите на Еврејската заедница се со општо инклузивен и демократски ков, лојални граѓани на земјава и почитувачи на сите нејзини етникуми.

„Факт се бројните жртви кои се дадени за оваа наша татковина за време на НОБ, како и пожртвуваноста на преживеаните од уништувачката војна и сите други историски предизвици. Малубројни, без никој свој, без дом останаа во своето гнездо и како и отсекогаш заедно со своите сограѓани ја идигнаа од пепел својата заедница и својата Македонија, сочувувајки ја и обновувајки ја еврејската вера, традиција и култура. Потенцираме дека останаа тука, не заминаа надвор од државата и со гордост себеси се нарекуваа и се нарекуваме македонски Евреи. Со жалење можеме да констатираме дека одредени политички субјекти, невладини организации, државни претставници и институции како и индивидуи не само што не ги почитуваат ставовите и мислењата на Еврејската заедница туку работат против нејзините интереси без притоа да се консултираат и ги слушнат аргументите“, велат од Еврејската заедница.

Со години наназад, Еврејската заедница и Фондот на холокаустот на Евреите од Македонија, се посочува во соопштението, максимално вложуваат во зачувување на најстарите Сефардски гробишта на Балканот, кои потекнуваат од 1497 година. Освен за еврејските гробишта во Битола, подеднакво се води грижа и за еврејските гробишта во Скопје и во Штип. Тие беа, се и ќе бидат свето место за македонските Евреи, наш верски, културен и национален аманет.

„Ги потсетуваме сите самонаречени, знајни и незнајни добронамерници и доброчинители дека за човештвото гробовите се место за почит и вечен мир. Не допуштаме каков било вид на инструментализации на нашите вечни почивалишта од страна на политички субјекти, интересовни групи, невладини организации, владини институции, сегашни и идни пратеници и можни функционери, како и амбасадори на странски држави акредитирани во Република Северна Македонија, поединци и подржувачи од земјата и странство. Нашите Еврејски гробишта во Битола не се повод за самопромовирање на поединци и организации ниту простор за бизарна промоција на гробиштата како туристичка атракција и спектакл. Во едно демократско, мултиетничко и мултиконфесионално општество, какво што е Северна Македонија ваквото однесување е недозволиво. Спротивно на ова, истакнуваме дека Еврејската заедница секогаш била, е и ќе биде благодарна на сечија подадена рака за партнерска соработка и ќе возврати со почит“, се вели во соопштението од Еврејската заедница.