„Еуромакс ресоурсис“ ја повикува министерката Шукова да се воздржи од лични ставови
Откако денеска министерката за животна средина, Каја Шукова, изјави дека ја размира загриженоста на граѓаните од Струмичко за изградбата на рудниците, „Еуромакс ресоурсис“ преку соопштение испрати апел носителите на државни функции да се воздржуваат од изнесување на лични ставови. Шукова рече дека нејзиниот личен став е против изградба на новите рудници.
„Изразуваме загриженост што процесот на реализација на најголемата инвестиција од независноста на државата повторно се внесува во контекстот на дневно политичката агенда. Освен што изминатите денови се зголеми интензитетот на пласман на манипулативни и лажни вести, се создава впечаток дека противниците на рудникот не се свесни за евентуалните правнофинансиски последици од непостапувањето согласно позитивните законски прописи.
Апелираме до носителите на државни функции да се воздржуваат од изнесување на лични ставови. Облигациониот однос меѓу ‘Еуромакс ресоурсис’ и Владата е државна работа која произлегува од правно валидни акти потврдени со одлуки на суд, а не приватен и личен однос меѓу случајни познајници. Министерката за животна средина и просторно планирање, Каја Шукова, има обврска да биде свесна на евентуалните правни последици од денешната нејзина изјава со која изрази личен став дека генерално е против рудници. Тоа прејудицира дека истата може да одлучува субјективно и пристрасно кога Еуромакс Ресоурсис ќе го достави дополнувањето на Елаборатот за влијание врз животната средина до МЖСПП. Истовремено, најавата за повторно преиспитување на веќе донесената одлука на Владата, патем чиј министер е и таа, за спојување на концесиите чиј носител е ‘Еуромакс ресоурсис’, е доказ за креирање на амбиент на правна несигурност.
Жалиме што ваквите политички ставови потсетуваат на предизборниот период во 2020 кога и некои други министри изјавуваа дека нема да ги почитуваат тогашните одлуки на Управниот и Вишиот управен суд кои правосилно го поништија Решението на Државната комисија за одлучување во управна постапка кое се однесуваше на барањето за дозвола за експлоатација. Мора да напоменеме дека вака срочените изјави и ставови се потенцијален доказ против државата во евентуална постапка пред меѓународна арбитража“, велат од компанијата.
„Еуромакс ресоурсис“ додава: „Цврсто сме убедени дека планираната инвестиција е во најдобар интерес на државата, нејзиниот долгорочен економски развој, и на локалните заедници. Реализацијата на овој проект е сигурно вин-вин сценарио: и економски развој, повеќе работни места, приход за граѓаните и безбедна, здрава, животна средина. Противниците на инвестицијата манипулираат со стари технолошки податоци, недостаток на факти и застарени информации. Создадовме целосно нов технолошки проект, за да обезбедиме стопроцентно отстранување на сите грижи на населението и целосно безбедна и здрава околина“.